EKIPA LIMPEZA ESGOTU KONTINUA HALA’O LIMPEZA BALETA NO MOTA LARAN IHA SIDADE DILI

𝐃𝐢𝐥𝐢, 𝟐𝟔 𝐌𝐚𝐢𝐮 𝟐𝟎𝟐𝟔

Autoridade Munisípiu Dili liu husi ekipa limpeza esgotu kontinua hala’o servisu limpeza baleta no mota laran iha sidade Dili atu garante fluxo bee la’o ho di’ak no prevene inundasaun bainhira tempu udan.

Atividade limpeza ohin ne’e hala’o iha fatin sira hanesan mota laran no valeta parte Zita Plaza nian, Bidau Sengol, Pantai Kelapa, Palapasu no Kaikoli no iha parte sira seluk iha dili laran. Ekipa limpeza hala’o servisu hodi hamoos fo’er, rai no lixu sira ne’ebé taka dalan bee nian iha baleta no mota sira.

Servisu limpeza esgotu ne’e importante tebes tanba bele ajuda prevene bee sa’e no inundasaun iha área rezidénsia no estrada sira, liuliu bainhira tempu udan boot. Aleinde ne’e, limpeza baleta no mota bele hamenus mós risku moras ne’ebé mai husi ambiente fo’er.

Objetivu husi atividade ne’e maka atu mantén sistema drenajen iha sidade Dili atu nafatin funsiona di’ak, asegura ambiente ne’ebé mós no saudavel ba komunidade, no proteje infraestrutura públika husi estragus tanba inundasaun.

Autoridade Munisípiu Dili husu ba komunidade hotu atu koopera hamutuk ho governu munisipál hodi mantén limpeza ambiente, liu husi labele soe lixu arbiru iha baleta, mota no bee dalan sira tanba bele taka drenajen no provoka inundasaun.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)