SMASA KONTINUA HALA’O LIMPEZA LOROLORON ATU MANTÉN SIDADE DILI MÓS NO SAUDÁVEL

𝐃𝐢𝐥𝐢, 𝟐𝟔 𝐌𝐚𝐢𝐮 𝟐𝟎𝟐𝟔

Autoridade Munisípiu Dili liu husi ekipa Servisu Munisipal Água, Saneamentu no Ambiental (SMASA) kontinua intensifika atividade limpeza loroloron iha área públiku sira iha sidade Dili, atividade limpeza loroloron ne’e hanesan parte esforsu ida ne’ebé atu mantén ambiente sidade Dili nian ne’ebé mós, saudavel no organizadu.

Atividade limpeza ne’e kobre área importante sira iha Dili laran, inklui Hotel PLM Spring, Jardin CAC, Largo Lecidere, Eskola Externato oin, Jardin Cristo Rei, BJ Habibie, Motael, Porto Dili oin, Aitarak laran, edifísiu CCLN Comoro oin no fatin sira seluk iha Dili laran.

Servisu limpeza ne’e hala’o regularmente kada loron husi ekipa SMASA ho objetivu atu prevene poluisaun ambientál, hamenus risku moras no hasa’e imagem sidade Dili atu sai limpa, furak no konfortável ba komunidade no vizitante sira.

Prezensa ekipa limpeza iha fatin públiku sira demonstra komitmentu Autoridade Munisipiu Dili atu kontinua fó atensaun ba limpeza no saneamentu ambientál iha munisípiu Dili.

Autoridade Munisipiu Dili mós husu ba komunidade hotu atu koopera hamutuk ho governu munisipál hodi mantein limpeza ambiente, liu husi soe lixu tuir fatin ne’ebé disponivel no labele soe lixu arbiru iha estrada, mota no área públiku sira.

Limpeza no beleza sidade la’ós responsabilidade governu de’it, maibé responsabilidade hamutuk husi komunidade tomak atu Dili sai sidade ne’ebé mós, saudavel no di’ak ba ema hotu.

Fontes : (𝗠é𝗱𝗶𝗮 𝗚𝗮𝗯. 𝗣𝗔𝗠)