𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒Í𝐏𝐈𝐔 𝐃Í𝐋𝐈 𝐇𝐄𝐓𝐀𝐍 𝐀𝐒𝐈𝐒𝐓𝐄𝐍𝐒𝐈𝐀 𝐓𝐄𝐊𝐍𝐈𝐊𝐀 (𝐃𝐆𝐃𝐋) 𝐊𝐎𝐍𝐀-𝐁𝐀 𝐏𝐋𝐀𝐍𝐄𝐀𝐌𝐄𝐍𝐓𝐔 𝐍𝐎 𝐉𝐄𝐒𝐓𝐀𝐔𝐍 𝐈𝐍𝐒𝐓𝐑𝐔𝐌𝐄𝐍𝐓𝐔 𝐃𝐄𝐙𝐄𝐍𝐕𝐎𝐋𝐕𝐈𝐌𝐄𝐍𝐓𝐔 𝐌𝐔𝐍𝐈𝐒𝐈𝐏𝐀𝐋

𝐃í𝐥𝐢, 𝟏𝟗 𝐀𝐠𝐨𝐬𝐭𝐮 𝟐𝟎𝟐𝟔.

Autoridade Munisípiu Díli (AMD) hetan formasaun husi diresaun geral dezenvolvimentu lokal ho tema “Planeamentu Munisipal no Jestaun Instrumentu Dezenvolvimentu Munisipal”, nu’udár esforsu atu hasa’e kapasidade téknika no komprensaun funsionáriu sira kona-ba prosesu planeamentu, implementasaun no jestaun dezenvolvimentu iha nível munisipal.

Formasaun nee, fó importánsia ba planeamentu ne’ebé sistemátiku, integradu no bazeia ba nesesidade komunidade sira-nian. Ho planeamentu ne’ebé diak, programa no atividade dezenvolvimentu munisipal bele implementadu no monitorizadu ho efisiénsia no efetividade, tuir prioridade no objetivu dezenvolvimentu iha Munisípiu Díli.

Iha sesaun abertura, Sekretáriu Munisípal Planeamentu, Investimentu no Dezenvolvimentu Integradu, Sr. Filomeno Maria Silva Smith, hateten katak, Autoridade Munisípiu Díli iha papel importante atu asegura prosesu planeamentu no dezenvolvimentu munisipal atu lao ho didiak, liuhusi koordenasaun, partisipasaun no jestaun ne’ebé efetivu.

SEKAM PIDI, “Papel Autoridade Munisípiu Díli nian mak atu garante katak, planeamentu no dezenvolvimentu munisipal bele responde ba nesesidade no prioridade komunidade, liúhusi instrumentu planeamentu ne’ebé klaru, integradu no bazeia ba realidade iha teritóriu”.

Nia mós subliña katak, planeamentu la’ós de’it prosesu administrativu, maibé sai nu’udár instrumentu importante ida atu determina prioridade, aloka rekursu apropriadu atu asegura implementasaun programa dezenvolvimentu ne’ebé fó benefísiu direta ba komunidade.

Liúhusi formasaun nee, partisipante sira hetan oportunidade atu aprofunda sira-nia koñesimentu kona-ba instrumentu planeamentu no dezenvolvimentu munisipal, inklui prosesu identifikasaun prioridade, preparasaun programa, jestaun implementasaun no monitorizasaun rezultadu.

Formasaun nee mós konsidera nu’udár plataforma importante atu hametin koordenasaun entre unidade no servisu hirak iha estrutura Autoridade Munisípiu Díli, atu nune’e planeamentu no implementasaun programa bele lao ho abordagem ne’ebé integradu no evita duplikasaun atividade.

Ho kapasidade téknika ne’ebé diak liután, funsionáriu sira espera bele kontribui efetivamente ba hadi’a kualidade planeamentu, jestaun rekursu no prestasaun servisu públiku, no iha tempu hanesan asegura katak programa dezenvolvimentu munisipal sira orienta ba rezultadu no nesesidade real komunidade.

Autoridade Munisípiu Díli kontinua fó prioridade ba dezenvolvimentu kapasidade rekursu umanu, liliu iha área planeamentu, jestaun, investimentu no prestasaun servisu públiku. Inisiativa hirak hanesan formasaun nee konsidera importante atu hametin governasaun munisipal ne’ebé efisiente, transparente, responsavel no orientadu ba interese komunidade.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)