𝐏𝐀𝐌 𝐃𝐈𝐋𝐈 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐊𝐎𝐌𝐄𝐌𝐎𝐑𝐀𝐒𝐀𝐔𝐍 𝐋𝐎𝐑𝐎𝐍 𝐅𝐀𝐋𝐈𝐍𝐓𝐈𝐋 𝐁𝐀 𝐃𝐀𝐋𝐀-𝟓𝟏 𝐈𝐇𝐀 𝐅𝐎𝐇𝐎 𝐌𝐀𝐓𝐄𝐁𝐈𝐀𝐍 𝐌𝐔𝐍𝐈𝐒𝐈𝐏𝐈𝐔 𝐁𝐀𝐔𝐂𝐀𝐔

𝐁𝐚𝐮𝐜𝐚𝐮, 𝟐𝟎 𝐀𝐠𝐨𝐬𝐭𝐮 𝟐𝟎𝟐𝟔

Prezidente Autoridade Munisipiu Dili (AMD), Sr. Francisco dos Santos, partisipa iha serimónia komemorasaun aniversáriu loron FALINTIL (Forças Armadas de Libertação Nacional de Timor-Leste), ba dala-51, ne’ebé hala’o iha foho Matebian, Munisípiu Baucau.

Serimónia ne’e marka prezensa husi Prezidente Repúblika, José Manuel Ramos-Horta, ne’ebé sai hanesan inspetór serimónia, hamutuk ho Xefe Estadu-Maior Jenerál F-FDTL, Tenente-Jenerál Domingos Raul Falur Rate Laek, membru Governu, korpu diplomátiku, lider Autoridade Munisipál sira, veteranu, komunidade no membru F-FDTL.

Iha nia diskursu, Prezidente Repúblika José Ramos-Horta hatudu respeitu ba heroís no lutadór rezisténsia sira ne’ebé sakrifika sira-nia moris no isin iha luta ba libertasaun no independénsia Timor-Leste. Nia subliña katak komemorasaun FALINTIL iha foho Matebian sai símbolu ida atu fó onra ba sira hotu ne’ebé halo sakrifísiu iha luta rezisténsia.

Prezidente Ramos-Horta mós hateten katak independénsia Timor-Leste hetan liuhusi unidade entre rezisténsia armada, rede klandestina no frente diplomátika, ne’ebé kada ida iha nia responsabilidade no kontribuisaun importante ba vitória luta nasionál.

Iha parte seluk, Xefe Estadu-Maior Jenerál F-FDTL, Tenente-Jenerál Domingos Raul Falur Rate Laek, apela ba povu Timor-Leste atu kontinua promove rekonsiliasaun, pás no estabilidade. Nia hateten katak foho Matebian sai testemuñu ba korajen no determinasaun povu Timor-Leste iha luta ba independénsia.

Falur Rate Laek mós konsidera komemorasaun ne’e, nu’udar momentu importante atu aprende hosi istória, fó respeitu ba mártires no lutadór rezisténsia, no hametin kompromisu ba pás no estabilidade nasionál.

Komemorasaun loron FALINTIL ba dala-51 ho tema “Hatudu Respeitu ba Mártires, Kompromisu ba Estabilidade no Pás”, ne’ebé fó énfaze ba sakrifísiu mártires no lutadór rezisténsia sira, no mós importánsia atu kontinua hametin unidade, pás no estabilidade iha Timor-Leste.

Partisipasaun Prezidente Autoridade Munisipiu Dili iha serimónia ne’e reprezenta kompromisu AMD atu kontinua fó apoiu no valoriza memória istórika, sakrifísiu no kontribuisaun heroís no veteranu sira ba libertasaun no konstrusaun nasaun Timor-Leste.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)