Bazeia ba Despaxu husi Primeiru Ministru, No. 015/GPM/VIII/2025, nomeia Sr. 𝐅𝐫𝐚𝐧𝐜𝐢𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬 hodi ezerse kargu no knaar nu’udar Prezidente Autoridade Munisipál Dili nian. No Despaixu No. 016/GPM/VIII/2025, ezonera Sr. Alexandrino Pires husi kargu no kna’ar nu’udar Prezidente Autoridade Munisipál Bobonaro, no nomeia Sr. 𝐏𝐚𝐮𝐥𝐨 𝐌𝐨𝐧𝐢𝐳 𝐌𝐚𝐢𝐚 hodi hala’o kna’ar nu’udar Prezidente Autoridade Munisípiu Bobonaro nian.

Iha diskursu S.E. Ministru MAE, Tomás do Rosário Cabral, afirma mos pontu importansia balun ba emposado nain rua katak, Ohin ita hare Presidente Autoridade Munisipiu nain rua hatais mutin no taka sapeo mutin mostra mai ita katak, laran mos hodi servi no servisu hamutuk ho povu.

Ministru MAE hatutan katak PAM sira nudar representante Governu Sentral iha Munisipiu hodi hala’o kna’ar sira mak hanesan atu organiza, Kordena, no orienta servisu sira iha munisipiu bele lao’o tuir orden. Ministru MAE apela mos ba PAM nain rua atu servisu makas hodi tun ba Sucos sira hodi rona povu sira nia defikuldades no saida mak sira nia prioridade ba desenvolvimentu.

S.E. Ministru mensiona mos asuntu sosiais nudar servisu importante ba PAM sira atu tau atensaun hodi hare ema volnuravel sira ke precisa tebes tulun husi governu. No S.E. Ministru apela ba PAM Bobonaro atu tau atensaun makas ba seitor agrikultura nune’e bele tulun povu sira atu bele hetan aihan sufisiente husi produsaun agrikultura nian hodi fó apoiu mos ba merenda escolar iha munisipiu Bobonaro.

S.E. Ministru MAE husu mos ba PAM dili atu tau atensaun makas ba servisu lixeru iha Dili, no hare mos servisu jestaun orden public hodi tun ba suco sira hodi hare problema sira iha komunidade ke sira infrenta hela, PAM sira nia servisu mak buka atu halo kordenasaun ho autoridade sira iha Dili hodi bele fó atendementu diak ba komunidade sira ne’ebé mak precisa Autoridade Munisipiu Dili nia tulun.

PAM Dili, Sr. Francisco dos Santos nu’udar sidadaun timoroan ne’ebé oras ne’e daudaun hala’o kna’ar nu’udar Sekretáriu Munisipál Planeamentu no Dezenvolvimentu Munisipál Autoridade Munisipál Dili nian, no antes ne’e okupa ona kargu oioin iha setór públiku, partikularmente iha nível munisipál. No PAM Bobonaro Sr. Paulo Moniz Maia nu’udar sidadaun Timoroan, eis Deputadu Parlamentu Nasionál, no okupa ona mós kargu oioin iha setór públiku, privadu, no asosiativu, partikularmente iha munisípiu Bobonaro.

Autoridade Munisipál sira nu’udar entidade jurídika tuir direitu públiku, dotada ho autonomia administrativa, autonomia finanseira ne’ebé luan, no ninia patrimóniu rasik, sujeita ba fiskalizasaun no tutela iha Ministru Administrasaun Estatál nian, ezerse ninia funsaun sira tuir termu sira ne’ebé define ona iha Dekretu-Lei No. 3/2016, loron 16 fulan-Marsu, ne’ebé republika husi Dekretu No. 84/2023, loron 23 fulan-novembru, ne’ebé aprova Estatutu Autoridade Munisipál sira no Grupu Tékniku Interministeriál ba Desentralizasaun Administrativa.

Prezidente Autoridade Munisipál nu’udar reprezentante Governu nian iha respetivu munisípiu no iha responsabilidade atu dirije órgaun no servisu sira Autoridade Munisipál nian, asegura koordenasaun servisu administrasaun lokál Estadu nian ne’ebé funsiona iha munisípiu, no hatán ba sira-nia atividade sira perante tutela tuir artigu 20, hosi Dekretu-Lei no. 3/2016, loron 16 fulan-Marsu, iha ninia redasaun atuál.

Enkuantu, artigu 21 husi Dekretu-Lei No. 3/2016, loron 16 fulan-marsu nian, iha nia redasaun atuál, estabelese katak Prezidente Autoridade Munisipál livremente hetan nomeasaun no ezonerasaun husi Primeiru-Ministru, tuir proposta husi Ministru Administrasaun Estatál.

Serimónia ne’e hetan partisipasaun husi Embaixadora Timor-Leste ba Japaun, Membru Governu, Xefe Gabinete sira, Prezidente Autoridade Munisipal, Autoridade Administrativa Ataúro, Diretór-Jerál no Diretór Nasionál sira MAE nian, Asesór sira, Administradór Postu Administrativu sira, Xefe Departamentu sira, Sekretáriu Munisípiu sira, Diretór Servisu Munisípiu sira, Membru Família sira husi nomeadu, no Funsionáriu sira Ministériu nian.

𝐌𝐞𝐝𝐢@𝐌𝐚𝐞_𝟐𝟎𝟐𝟓Noticia Kompletu