𝐇𝐚𝐦𝐞𝐭𝐢𝐧 𝐊𝐨𝐫𝐝𝐞𝐧𝐚𝐬𝐚𝐮𝐧 𝐋𝐢ñ𝐚-𝐌𝐢𝐧𝐢𝐬𝐭𝐞𝐫𝐢𝐚𝐥 𝐛𝐚 𝐊𝐨𝐧𝐭𝐫𝐨𝐥𝐮 𝐓𝐫𝐚𝐟𝐢𝐤𝐮 𝐢𝐡𝐚 𝐬𝐢𝐝𝐚𝐝𝐞 𝐃𝐢𝐥𝐢

𝐃𝐢𝐥𝐢, 𝟎𝟗 𝐀𝐛𝐫𝐢𝐥 𝟐𝟎𝟐𝟔

Prezidente Autoridade Munisípiu (PAM) Dili, Sr. Francisco dos Santos hamutuk ho Diretór Jeral Seguransa no Prevensaun Konflítu (DGSPC), Gaspar Pereira de Sousa “Sardou”, Diretór Tranzitu Seguransa Rodaviária-DTSR, Superentidente Xefé da polísia Antonino Maulutu, Diretór Diresaun Nasionál Seguransa Todoviária-DNSR MI, Elder Soares, Reprezentante Diretóra Diresaun Nasionál Transporte terrestre-DNTT, Diretór Nasionál Manutensaun no konservasaun Vias Rodaviárias-MOP, Komandante komandu Polísia Munisípiu Díli, Diretóra Diresaun Nasionál Servisu Organizasaun Urbana-DNSOU, realiza enkontru kordenasaun servisu Lina Ministeriál, ho objetivu atu diskute no reforsa fiskalizasaun no inspeksaun ne’ebé durante ne’e Diresaun Nasionál Seguransa Rodaviária-DNSR MI hala’o iha terenu kona-ba sinalizasaun, CCTV, Scooter, estasionamentu no utentes iha sidade dili inklui munisipiu. Enkontru ne’e realiza iha Salaun Migrasaun Ministériu do Interior kinta-feira ne’e.

Iha diskusaun ne’e, kada liña ministerial hatoo ida idak nia intervensaun hodi diskuti kona-ba situasaun ne’ebé sidade dili hasoru hanesan engrafamentu, sinais tranzitu, estasionamentu no seluk tan, tamba tuir fiskalizasaun no inspeksaun husi Diresaun Nasionál Seguransa Todoviária-DNSR MI, hala’o iha terenu katak, iha kondisaun ka situasaun balun ne’ebé presija Hadia, tamba ne’e liu husi enkontru ne’e oinsa atu buka solusaun hodi minimiza risku sira nebe akontese iha dili laran.

Iha PAM Dili nia intervesaun hatete, enkontru ne’e importante tebes, oinsa atu resolve aktu sira ne’ebé iha, liu-liu ba sira ne’ebé uja transporte no mos uja espasu publiku ne’ebé dala barak kontra regra “ita uja espasu publiku tenke uja ho kuidadu no regra, para bele Evita situasaun ne’ebé mak ladiak. relasiona ho preokupasaun ne’ebé iha ita presija halo planu ne’ebé mak di’ak hodi nunee superior sira bele diskuti, no ba tekniku sira presija halo servisu ida ne’ebé integradu para hodi bele fo solusaun.”

“Ba Autoridade Munisipiu Dili kualker entidade ne’ebé hakakak kria kondisaun ne’ebé mak di’ak ba munisipiu dili, AMD prontu apoiu nafatin” PAM hatutan.

Iha diskusaun ne’e kada ministeriu kontribui ideia no rekomendasaun konstrutivu, liu-liu foka liu ba asuntu importante hanesan: Fiskalizasaun sinalizasaun Estrada, Uzu no monitorizasaun sistema CCTV, Regulamentu utilizasaun scooter, Jestaun no kontrolu estasionamentu, Disiplina utentes estrada iha sidade Dili.

Espera katak liu husi enkontru ida ne’e bele hamosu solusaun konkretu hodi hadi’a sistema trafiku no seguransa rodoviária, nune’e mos kontribui ba orden públiku no bem-estar komunidade iha Munisípiu Dili.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)