AUTORIDADE MUNISÍPIU DILI (AMD) PARTISIPA IHA KONSELLU MINISTRUS EXTRA ORDINARIU NE’EBE HALA’O IHA AUDITÓRIU KAY RALA XANANA GUSMÃO, IHA MINISTÉRIU FINANSAS, DILI.

𝐃í𝐥𝐢 𝟐𝟕 𝐌𝐚𝐢𝐮 𝟐𝟎𝟐𝟔

Autoridade Munisípiu Dili (AMD) partisipa iha Konsellu Ministrus Extra Ordinariu ne’ebe hala’o iha Auditóriu Kay Rala Xanana Gusmão, iha Ministériu Finansas, Dili, atu analiza pontu situasaun kona-ba ezekusaun orsamentál husi departamentu governamentál sira no organizmu autónomu ida-idak, iha ámbitu Orsamentu Jerál Estadu ba tinan 2026 (OJE 2026), ne’ebé aprova hosi Lei n. 8/2025, loron 27 fulan-novembru.

Sorumutu ne’e hetan partisipasaun hosi membru Governu hotu-hotu, nune’e mós responsavel sira hosi institutu no organizmu sira ne’ebé integradu iha administrasaun indireta Estadu nian.

Ezekusaun OJE 2026 atinje ona 30% hosi loron 1 fulan-janeiru to’o loron 26 fulan-maiu tinan 2026, (inklui seguransa sosiál). Husi OJE ne’ebé estabelese ho total dolar amerikanu biliaun 2,445, maizumenus dolar amerikanu millaun 736 mak ezekuta ona to’o agora.

Iha sorumutu ne’e, analiza ona dezafiu prinsipál sira relasiona ho ezekusaun orsamentál, liuliu kona-ba aplikasaun Kódigu Aprovizionamentu no Kontratus Públikus foun, nune’e mós nesesidade no medida sira ne’ebé ho objetivu atu reforsa kapasidade ezekusaun programa no projetu sira ne’ebé prevee ona iha OJE 2026 nian.

(𝐌é𝐝𝐢𝐚 𝐆𝐚𝐛.𝐏𝐀𝐌)