𝐏𝐀𝐌 𝐃𝐈𝐋𝐈 𝐅Ó 𝐏𝐎𝐒𝐒𝐄 𝐁𝐀 𝐄𝐒𝐓𝐑𝐓𝐔𝐓𝐔𝐑𝐀 𝐅𝐎𝐔𝐍 𝐀𝐔𝐓𝐎𝐓𝐈𝐃𝐀𝐃𝐄 𝐌𝐔𝐍𝐈𝐒Í𝐏𝐈𝐔 𝐃𝐈𝐋𝐈.

𝐃𝐢𝐥𝐢, 𝟎𝟏 𝐣𝐮ñ𝐮 𝟐𝟎𝟐𝟔

Prezidente Autoridade Munisipiu Dili, Sr. Francsco dos Santos akompaňa husi Diretor-Geral Dezentralizasaun no Governu Lokal (DGDGL), Sr. António Augusto Guteres, ne’ebé reprezenta Ministru Administrasaun Estatál, S E. Tómas do Rosário Cabral, Komisáriu funsaun Públika, Sr. José Talo Soares Cristóvão, Reverendisimu Pe. Bernardo Paiva Fó tomada dé pose ba estrutura foun Autoridade Munisipiu Dili. Serimónia tomda dé pose ne’e hala’o iha salaun B AMD.

Iha serimónia ne’e, emposadu sira ne’ebé nomeadu ba kargu foun halo juramentu atu hala’o sira-nia responsabilidade ho profesionalizmu, integridade no dedikasaun ba servisu públiku.

Objetivu prinsipál husi mudansa estrutura ne’e atu hadi’a di’ak liu tan efisiénsia servisu, hametin koordenasaun no atu atinji prioridade servisu AMD nian.

Relasiona ho tomada dé pose ba kargu foun, PAM Dili husu ba responsavel sira ne’ebé simu konfiansa atu la haree ba kargu hanesan priviléjiu pesoál, maibé nu’udar responsabilidade públiku ne’ebé tenke hala’o ho laran-metin no integridade.

“Podér ne’ebé simu tau iha bolsu, labele tau iha fuan no tenke uza ho responsabilidade atu atinji rezultadu ne’ebé benefísiu instituisaun no povu.”

intervensaun komisáriu komisaun funsaun Públika, Sr. José Talo Soares Cristovão iha serimónia tomada dé pose ba estrutura foun Autoridade Munisípiu Dili, katak nomeasaun ba kargu sira ne’e mai husi natureza rua, maibé iha objetivu ida de’it, mak atu servisu ba Estadu no povu ho responsabilidade no dedikasaun.

“Nomeasaun ba kargu sira ne’e mai husi natureza rua. Kargu lideransa hanesan Prezidente Autoridade Munisípiu, Sekretáriu Munisípiu no Diretór Munisipál sira nomea tuir Dekretu-Lei n.º 34/2025, ne’ebé altera Dekretu-Lei n.º 84/2023, de 23 Novembru, enkuantu xefe departamentu sira nomeadu liuhosi despaxu Komisaun Funsaun Públika. Maski prosesu nomeasaun hirak ne’e la hanesan, maibé iha objetivu ida de’it atu servisu Estadu no Povu,” Komisáriu ne’e hateten.

Nia mós enfatiza katak kargu ne’ebé simu la’ós priviléjiu ka rekoñesimentu ba méritu pesoál de’it, maibé responsabilidade atu fó solusaun ba problema sira ne’ebé eziste iha Munisípiu Dili.

Iha fatin hanesan, Diretor-Geral Dezentralizasaun no Governu Lokal (DGDGL) Sr. António Augusto Guteres ne’ebé reprezenta S.E Ministru Administrasaun Estatal, Tomás do Rosário Cabral, apela ba emposadu sira atu servisu ho dedikasaun, kontinua aprende no servisu hamutuk hodi hatudu katak Munisípiu Dili bele sai ezemplu ba munisípiu sira seluk.

“Konfiansa ne’ebé Estadu fó ba ita boot sira tenke akompaña ho autokonfiansa, komitmentu no rezultadu servisu ne’ebé di’ak. Konfiansa ne’e sei depende ba avaliasaun dezempeñu no kontribuisaun ne’ebé ita boot sira fó ba instituisaun no povu, aleinde ne’e mós Susesu mandatu PAM Dili no programa governativu sira depende ba kontribuisaun no kolaborasaun hosi imi hotu,” dehan DGDGL.

Enkuantu totál emposadu ne’ebé ohin simu pose ne’e kompostu husi Secretário Municipal na’in ida (1), Diretores hamutuk na’in ualu (, Sefe Departamentu na’in ualu ( ho totál emposadu hamutuk na’in sanulu resin hitu (17).

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)