𝐃í𝐥𝐢, 𝟏𝟏 𝐉𝐮ñ𝐮 𝟐𝟎𝟐𝟔

Autoridade Munisípiu Díli, liuhusi diresaun Servisu Munisipal Partimónia no logistika, realiza formasaun kona-ba preenximentu Trip Tiket Viatura Estadu ba kondutór sira iha resintu Autoridade Munisipiu Dili (AMD), ho objetivu atu hasa’e konesimentu no kapasidade teknika kondutór sira iha jestaun no utilizasaun viatura Estadu tuir regra no prosedimentu administrativu ne’ebe vigor.

Iha Formasaun ne’e Diretora Servisu Munisipal Partimónia no logistika, Madalena da C. S. da Costa, husu ba kondutores sira atu iha responsabilidade ba ida idak nia Viatura Estadu nian, tanba ne’e liu husi formasaun ohin espera ita bo’ot sira servisu ho responsabilidade, tenki kumpri prosedimentu trip tiket no kumpri regras utilizasaun viatura Estadu nian liu liu iha kombustivel atu uza ho didiak no ónestidade.

Iha abertura, Sekretária Munisípal Administrasaun no Finansas. Ana F. Guterres Junior, hateten formasaun ohin importante tebes atu hodi hasae ita bot sira nia koñesimentu konaba preenximentu trip tiket. Trip Tiket nu’udar dokumentu importante ida ne’ebé, uza atu rejista movimentu viatura Estadu, inklui objetivu viajen, destinasaun, distánsia, konsumasaun kombustível no informasaun relevante seluk, nune’e preenximentu ne’ebé loos sei ajuda garante transparensia akuntabilidade no kontrolu diak liu ba patrimóniu Estadu.

Durante formasaun ne’e, partisipante sira hetan esplika detallu kona-ba oinsá preenxe formuláriu Trip Tiket ho loos, prosedimentu antes no depois uza viatura Estadu, no responsabilidade kondutór sira iha manutensaun no utilizasaun bens públiku.

Atividade ne’e mos hanesan parte husi esforsu Autoridade Munisipiu Dili atu hametin governasaun diak, aumenta disiplina administrativu no asegura katak utilizasaun viatura Estadu hotu halo tuir prinsipiu efisiensia, efikásia no responsabilidade.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)