𝐃𝐢𝐥𝐢, 𝐉𝐮ň𝐮 𝟐𝟎𝟐𝟔

Prezidente Autoridade Munisípiu (PAM) Dili, Sr. Francisco dos Santos, hamutuk ho Diretór Geral STAE Munisípiu Dili, Elviro Fernandes Moniz no Segundu Komandante Komandu Polisia Nasionál Timor Leste (PNTL) Dili, Superientendente Luis da Silva ne’ebé reprezenta komandante Munisipiu Dili, hala’o enkontru koordenasaun prelimináriu ba preparasaun Eleisaun Prezidensial tinan 2027 iha salaun B Autoridade Munisípiu Dili Segunda Feira ne’e.

Objetivu husi enkontru ne’e, Diskute preparasaun prelimináriu ba Eleisaun Prezidensiál tinan 2027, inklui papél no responsabilidade instituisaun relevante sira iha apoiu ba prosesu eleitorál.

PAM hateten, reuniaun koordenasaun prelimináriu entre STAE, Autoridade Munisípiu Dili no PNTL importante tebes atu asegura preparasaun ba Eleisaun Prezidensiál 2027 bele la’o ho di’ak, seguru no transparente.

“Reuniaun ida-ne’e importante tebes tanba liu husi koordenasaun entre STAE, AMD no PNTL, ita bele prepara di’ak liu tan prosesu eleisaun tinan 2027 atu la’o ho susesu. Servisu ekipa no servisu hamutuk entre instituisaun sira mak sai xave atu garante estabilidade no seguransa durante prosesu eleitorál,” hateten PAM Dili.

Iha oportunidade ne’e, PAM Dili mós hato’o preokupasaun kona-ba implementasaun sistema resenseamentu biométriku ne’ebé sei la’o neineik tanba servisu ne’e sei konsentra liu iha sentru munisípiu.

“Ami observa katak prosesu resenseamentu biométriku sei la’o neineik tanba konsentra de’it iha sentrál ka sede munisípiu. Ami hanoin katak importante atu alarga servisu ida-ne’e ba postu administrativu hotu-hotu atu fasilita povu no evita posibilidade dupla kartaun eleitorál,” hateten PAM Dili.

Nia mós enfatiza katak implementasaun biométriku ho di’ak sei ajuda governu no entidade relevante sira atu hetan dadus ne’ebé loos kona-ba númeru reál populasaun eleitorál iha Munisípiu Dili.

“Kuandu sistema biométriku implementa hotu ona, ita bele hatene ho lolos totál populasaun eleitorál iha Dili, tanba durante ne’e movimentasaun populasaun tun-sae kontinua akontese,” dehan nia.

Relasiona ho preokupasaun ne’ebé hato’o husi PAM Dili kona-ba implementasaun sistema resenseamentu biométriku, Diretór Jerál STAE, Elviro Fernandes Moniz, hateten katak STAE kontinua servisu maka’as atu buka solusaun ba dezafiu sira ne’ebé durante ne’e hasoru iha terenu.

“STAE komprende preokupasaun ne’ebé hato’o husi Prezidente Autoridade Munisípiu Dili. Tanba ne’e, ami kontinua halo esforsu atu hadi’a no hametin implementasaun sistema biométriku, hodi nune’e bele estabelese servisu ne’e iha postu administrativu hotu-hotu.” hateten DG STAE.

DG mós hatutan, konserteza eleisaun prezidensiál ne’e sei akontese iha fulan marsu tinan 2027. Tanba ne’e STAE presiza halo preparasaun másimu ho entidade relevante hotu antes tama ba iha eleisaun refere.

Enkuantu enkontru preliminar ne’e marka prezensa másimu husi Secam I, secam II, Diretor/a sira, APA na’in 5, Autoridade Lokal, estrutura husi STAE no partisipante sira seluk.