𝐃𝐢𝐥𝐢, 𝐉𝐮ň𝐮 𝟐𝟎𝟐𝟔

Prezidente Autoridade Munisipiu (PAM) Dili, Sr. Francisco dos Santos, hala’o enkontru ho Asesor Legal Ministériu Administrasaun Estatál (MAE), Dr. Nuno, hodi diskute no haktuir progresu ezbosu lei ne’ebé Autoridade Munisipiu Dili (AMD) aprezenta ona ba MAE atu hetan aprovasaun.

Iha enkontru ne’e, parte rua ne’e ko’alia liuliu kona-ba asuntu importante rua, mak utilizasaun espasu públiku no obrigasaun kontribuisaun/taxa ba utilizadór sira, no mós regulamentu ba vendedór ambulante movel sira ne’ebé uza espasu públiku atu hala’o atividade komersiál.

Hatán ba aprezentasaun husi PAM Dili, Dr. Nuno, nu’udar Asesor Legal MAE, esplika katak iha ona instrumentu jurídiku balun ne’ebé bele sai hanesan baze legál ba AMD atu regulariza utilizasaun espasu públiku no implementa mekanizmu kobransa taxa tuir lei no regulamentu sira ne’ebé vigora atualmente.

Dr. Nuno hateten katak Dekretu-Lei Nú. 33/2008, Dekretu-Lei Nú. 03/2016, no Diploma Ministerial Nú. 85 fó apoiu legál ba Autoridade Munisipiu Dili atu organiza, regula no kontrola utilizasaun espasu públiku iha territóriu munisipál.

Maski nune’e, nia mós rekomenda atu AMD prepara no haruka karta justifikasaun téknika ba MAE hodi fortalese proposta ne’ebé relasiona ho utilizasaun espasu públiku no medida regulatóriu sira ne’ebé sei implementa iha futuru.

Enkontru ne’e reflete komitmentu Autoridade Munisipiu Dili no Ministériu Administrasaun Estatál atu hametin baze legál no hadi’a jestaun espasu públiku, nune’e mós atu asegura orden, limpeza no organizasaun atividade ekonómika iha área públika sira iha Munisipiu Dili.

Fontes : (𝐌𝐞𝐝𝐢𝐚 𝐆𝐚𝐛. 𝐏𝐀𝐌)