𝐃í𝐥𝐢 𝟑𝟎 𝐉𝐮ñ𝐮 𝟐𝟎𝟐𝟔

Alumni Parlamentu Foin Sae Timor Leste halo audénsia ho Prezidenti Autoridade Munisípiu (PAM) Díli, Sr. Francisco dos Santos hodi hato’o informasaun no halo koordenasaun kona-ba implementasaun Programa YEAP sigla inglesh (Youth Employability Accelerator Project), ne’ebé orienta ba dezenvolvimentu kapasidade no hadi’a oportunidade servisu ba juventude sira.

Dadaun ne’e APFTL servisu hamutuk ho parseiru Oxfam Timor Leste liu husi Projetu Acelerador Empregabilidade Juventude ne’ebe atu prepara joven sira ba merkadu servisu no apoiu sira atu dezenvolve negosiu rasik liu husi dezenvolvimentu abilidade, mentoria no ligasaun ho emprendedór sira iha Munisípiu tolu mak hanesan Atauru, Ermera no Díli.

Iha enkontru ne’e, reprezentante APFTL esplika objetivu prinsipal programa nian, liuliu hodi haforsa kompeténsia juventude sira, promove treinamentu relevante ba merkadu servisu, no kria oportunidade ba empregu no atividade empreendedorizmu. Programa ne’e mos hakarak hametin kolaborasaun entre instituisaun governu, parseiru dezenvolvimentu no komunidade hodi garante implementasaun ne’ebé efetivu no sustentavel.

Iha ambitu nee PAM hatete katak governasaun munisípiu sei kontinua fo apoiu ba atividade sira ne’ebé kontribui ba dezenvolvimentu rekursu umanu no hasa’e kapasidade juventude iha Munisípiu Díli.

“ Hau enkoraja ita bo’ot sira atu nafatin sai joven ne’ebe pro ativu, kriativu no partisipativu, tanba joven ne’ebe partisipativu seidauk to bainhira la kriativu, bainhira ita bo’ot sira tama iha faze kriativu maka foin hetan espasu barak hodi realiza planu sira ne’ebe mak ita bo’ot sira iha. Tamba ne’e husu nafatin ba ita bo’ot keta baruk atu estuda no nafatin hakbesik an ba entidade relevantes sira hanesan IADE, SEFOPE, no SEECOP tanba sira iha fundus hodi hare kona-ba joven sira ne’ebe mak kriativu.” Hateten PAM.

Iha fatin hanesan PAM mos husu ba APFTL atu fo sensibilizasaun ba joven sira liu-liu kona-ba kombate sigaru no informasaun falsu (HOAX) iha Média sosial tanba dadaun ne’e maioria joven sira konsumu sigaru makas no fiar liu ba informsaun falsu (HOAX) iha Media sosial.

Liu husi audénsia ida ne’e, espera katak koordinasaun entre APFTL no PAM bele hametin implementasaun programa no lori benefísiu direta ba juventude sira, atu bele prepara an ba oportunidade servisu no kontribui ba dezenvolvimentu sosioekonómiku iha futuru.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)