𝐃𝐢𝐥𝐢, 𝟎𝟏 𝐉𝐮𝐥𝐥𝐮 𝟐𝟎𝟐𝟔

Autoridade Munisípiu Dili (AMD), liu husi ekipa Limpeza Esgotu no Mota Laran kontinua hala’o atividade limpeza loron-loron iha valeta no mota laran. Atividade ida-ne’e inklui hasai fo’er no lixu ne’ebé komunidade balun soe arbiru iha valeta no mota, ho objetivu atu garante bee la’o di’ak, hamenus risku inundasaun durante tempu udan no prevene mós propagasaun moras ne’ebé bele mosu husi ambiente ne’ebé la higiene.

Autoridade Munisípiu Dili nafatin apela ba komunidade hotu atu tau konsiénsia ambientál liu husi soe lixu tuir fatin ne’ebé AMD prepara ona iha kada bairru, no labele soe lixu arbiru iha valeta, mota ka fatin públiku sira. Tanba, ambiente ne’ebé mós presiza kooperasaun no konsiénsia komunidade tomak atu hamutuk kria Munisípiu Dili ida-ne’ebé mós, saudável no livre husi inundasaun.