𝐃í𝐥𝐢, 𝟖 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisipál (PAM) Dili, Sr. Francisco dos Santos, hala’o enkontru ho Adida ba Kooperasaun Embaixada Portugés iha Díli, Dra. Ana Pereira, hamutuk ho Presidente da Construção Pública de Portugal no nia ekipa tékniku, hodi ko’alia kona-ba inísiu prosesu dezeñu no konstrusaun Eskola Portuguesa Dili foun iha Kaikoli.

Ekipa ne’e kompostu husi Eng. Nuno Catarro, Diretor Geral de Investimento da Empresa; Eng. Mário Coelho, Diretor da Área da Obra (Obras da Educação); no Arquiteto Tiago Rocha, Diretor da Área do Projetu. Projetu ne’e realiza tuir mandatu husi Ministériu Edukasaun Portugés, no enkontru ne’e hala’o iha Salaun A Autoridade Munisipál Dili (AMD).

Durante enkontru, parte rua mós reafirma importánsia kooperasaun institusionál entre Portugál no Timor-Leste liuhusi investimentu iha setór edukasaun, atu kontribui ba dezenvolvimentu rekursu umanu no promosaun língua portugés hanesan língua ofisiál.

PAM Dili informa katak terenu ba projetu ne’e atribui husi Ministériu Justisa, no prosesu lisensiamentu inklui serimónia kulturál sei hala’o tuir kostume no tradisaun lokál. PAM Dili mós husu atu konsidera prioridade ba traballadór timoroan sira ne’ebé hela besik área konstrusaun, proposta ne’ebé sei hetan konsiderasaun husi Embaixada Portugés no Construção Pública de Portugal.

Prezidente Autoridade Munisipál Dili reafirma kompromisu atu fó apoiu tomak ba implementasaun projetu ne’e hodi garante prosesu konstrusaun la’o di’ak no tuir planu. Projetu Escola Portuguesa Dili foun mós previstu sei iha gabinete médiku no enfermajen atu fó atendimentu saúde ba estudante no profesór sira, no espera bele sai fatin importante ida atu hasa’e kualidade edukasaun no hametin utilizasaun língua portugés iha Timor-Leste.

Durante enkontru ne’e, parte rua konfirma katak estudu preparatóriu ba projetu sei hahú iha tinan 2026, tuir fali konkursu ba dezeñu no konstrusaun iha 2027. Obra ne’e previstu remata iha tinan 2029, atu atividade letiva bele hahú iha fulan Setembru tinan ne’ebá. Eskola ne’e sei akomoda estudante hamutuk rihun rua (2.000), ho sala aula hamutuk 70, husi ensinu pré-eskolár to’o ensinu sekundáriu. Governu Portugés aprova ona orsamentu hamutuk US$22 millaun liuhusi Orsamentu Jerál Estadu Portugés atu finansia projetu ne’e.