SMnewstl.com
| Díli, 20 Jullu 2026 – Ministériu Administrasaun Estadu (MAE), hamutuk ho Sekretáriu Estadu Asuntu Toponímia no Organizasaun Urbana (SEATOU), hahú koordenasaun ho entidade relevante sira atu reorganiza sistema estasionamentu iha área Cristo Rei no espasu públiku sira iha sidade Díli.

Ministru Administrasaun Estadu, Tomás do Rosário Cabral, hamutuk ho Sekretáriu Estadu SEATOU, Germano Santa Brites Dias, lidera enkontru ho Diresaun Nasionál Transportes Terrestres (DNTT) no Autoridade Munisípiu Díli (AMD), hodi diskute planu atu hadi’a ordenamentu urbana no sistema transportes iha kapitál.

Iha enkontru ne’e, parte sira haree medida importante sira hanesan kria zona estasionamentu foun iha fatin estratéjiku, implementa sistema estasionamentu ho tempu limitadu, no organiza fatin ba vendedór ambulante sira atu evita okupasaun espasu públiku ne’ebé bele hamenus mobilidade komunidade.

Ministru Tomás do Rosário Cabral hateten katak reorganizasaun estasionamentu sai pasu importante atu kria Díli ne’ebé liu tan ordenadu, seguru no fasilita movimentu veíkulu no ema sira.

Nia hateten katak kolaborasaun entre instituisaun sira mak sai fator xave atu asegura implementasaun politika ordenamentu urbana bele lao ho efisiente no fó benefísiu ba sidadaun sira.

Planu ida-ne’e parte husi estratéjia Governu atu hadi’a jestaun espasu públiku no infraestrutura urbana iha Díli, liuhosi kooperasaun entre MAE liuhosi SEATOU, DNTT no AMD.

Ho reorganizasaun ne’e, Governu iha objetivu atu hamenus kongestionamentu tráfiku, aumenta seguransa no kria ambiente urbana ne’ebé di’ak liu ba komunidade iha sidade Díli.

Fontes : SMnewstl.com