𝐃í𝐥𝐢, 𝟐𝟖 𝐉𝐮𝐥𝐥𝐮 𝟐𝟎𝟐𝟔

Objetivu husi enkontru ne’e, atu koalia kona-ba Apoiu Voluntariu sira husi Australia ba Autoridade Munisipiu Dili. Enkontru ne’e hala’o iha Gabinete PAM nian.

Sr. José Francisco de Sousa – Country Program Manager, Australian Volunteers Program (AVI) iha Timor-Leste, informa ba PAM Dili katak Australian Volunteers Program, ne’ebé hetan finansiamentu husi Governu Austrália, iha misaun atu kontribui ba dezenvolvimentu sustentável iha Timor-Leste liuhusi mobilizasaun voluntáriu sira ne’ebé fahe koñesimentu, kapasidade téknika no esperiénsia profissional ba instituisaun parseiru sira.

Em jeral, AVI prontu atu apoiu AMD iha area dezenvolvimentu sira no depende ba iha nesesidade AMD nian. No AVI hakarak rona direta husi AMD hodi realiza iha tempu badak.

Iha parte seluk, PAM Dili, Sr. Francisco dos Santos, apresia tebes ho prezensa AVI iha Timor-Leste, liuliu hanoin sira atu apoiu ba iha instituisaun sira, espesialmente ba iha AMD. Tuir PAM Dili, kestaun boot Dili infrenta maka planu mestradu urbana ba iha Dili maka seidauk klaru. Maske nune’e, Munisipiu Dili nudar Kapital Nasaun, persija halibur hanoin no ideas barak hodi dezenvolve Dili sai diak liu. Tanba ne’e, Munisipiu Dili persija duni apoiu voluntariu sira husi Australia iha area sira maka hanesan:

a) Mudansa Klimatika – prevensaun Inundasaun;

b) Dezenvolvimentu ekonomia – area turizmu no diversifikasaun merkadu;

c) Landscape Gardening (jestaun Jardin) no;

d) Rekursu Umanu – Integrasaun Sistema digitalizasaun. PAM espera katak AVI bele suporta area prioridade haat ne’e.

Jerente AVI – Sr. Jose Sousa kontente ho nesesidade sira ne’ebe hato’o husi PAM Dili no sei halo asaun imidiata hodi nune’e bele hetan voluntariu sira lalais. Tanba prosesu ne’e sei lori tempu estimasaun katak parese bele realiza iha fulan 3 to’o 6 nia laran. Nia mos hateten katak dadaun ne’e AVI apoiu ona voluntariu sira iha Aileu, Ermera no RAEOA.

Fontes : (𝐌𝐞𝐝𝐢𝐚 𝐆𝐚𝐛. 𝐏𝐀𝐌)