Autoridade Munisipál (PAM) Dili, hamutuk ho EDTL EP, SEATOU no MSSI no Terras Propriedades organiza diálogu ho família hamutuk uma kain 21 ne’ebé okupa areadores EDTL EP iha Caicoli, hodi ko’alia kona-ba implementasaun Planu konstrusaun EDTL foun iha área refere.

Enkontru ne’e realiza iha Salaun EDTL EP Caicoli, hodi fó oportunidade ba komunidade atu espressa sira-nia preokupasaun no hamutuk buka solusaun liuhusi diálogu entre parte EDTL,EP no okupante sira.

Iha diálogu ne’e, Vise-Prezidente Konsellu Administrasaun no Komisáriu Ezekutivu Servisu Korporativu EDTL EP, Sr. Júlio de Jesus Gonçalves, hateten katak prosesu final detail dezenho ba konstrusaun foun EDTL,EP tama ona ba faze final, no Governu planeia atu hahú harahun edifísiu tuan iha inísiu fulan Novembru 2026 no inisiu dezembru sei konstrui edifísiu sentral foun ho andar tolu.

Nia esplika katak implementasaun projetu ne’e sei halo tuir kalendáriu aprovizionamentu ne’ebé tama ona ba faze final, no okupantes sira iha área refere, inklui BTL,EP no Diresaun Jerál Eletrisidade, Bee no Saneamentu, sei prepara atu muda ba fatin temporáriu.

PAM Dili hateten katak diálogu ne’e realiza atu rona diretamente preokupasaun komunidade ne’ebé hela iha propriedade Estadu no buka dalan di’ak liuhusi dialogu ho okupantes sira, no PAM reafirma katak, maski projetu refere tenke implementa tuir desizaun Governu Sentral, maibe nafatin kontinua buka solusaun ne’ebé di’ak ba okupantes.