Díli, 03 Agostu 2026

Autoridade Munisípiu Díli (PAM) liuhusi PAM Dili, Sr. Francisco dos Santos, no Fundasaun Fitun Naroman Timor-Leste (FINARTIL) hala’o enkontru koordenasaun hodi ko’alia kona-ba implementasaun programa resiklajen no konservasaun ambiente atu hadi’a jestaun lixu iha kapitál dili ho di’ak iha futuru.

Iha enkontru ne’e parte FINARTIL aprezenta ninia programa Recycling Promotion Pilot Project ba PAM no iha inisiativa hakarak servisu hamutuk ho PAM Díli hodi buka solusaun ba dezafiu jestaun lixu iha kapitál Dili oinsá atu rejeita, resikla no reutiliza hodi hamenus lixu no transforma inovasaun.

Hafoin ne’e parte rua diskute mós kona-ba esperiénsia no kontribuisaun FINARTIL liuhusi programa “Recycling Promotion Pilot Project”, ne’ebé durante ne’e fó apoiu ba promosaun reutilizasaun no resiklajen fo’er sira.

iha fatin hanesan, PAM Díli apresia ho inisiativa husi FINARTIL, no nia afirma katak, AMD sempre aberta ba parseria ho instituisaun sira ne’ebé iha objetivu ne’ebé di’ak hodi hadi’a gestaun lixu iha kapitál dili.

Ba futuru, PAM Díli no Fundasaun Fitun Naroman Timor-Leste planeia atu kontinua halo koordenasaun téknika hodi esplora oportunidade kolaborasaun iha implementasaun programa resiklajen ba jestaun lixu hodi nune’e hametin sustentabilidade ambientál iha Munisípiu Díli.