XEFI GABINETE AMD, SR. JULIO DA SILVA, REPREZENTA PAM DILI, PARTISIPA, IHA LANSAMENTU OFISIAL LoroTel SOLUTIONS, IHA FATUHADA, POSTU ADMINISTRATIVU DOM ALEIXO
𝐃𝐢𝐥𝐢, 𝟏𝟏 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔
Xefi Gabinete Autoridade Munisípiu Dili (AMD), 𝐒𝐫. 𝐉𝐮𝐥𝐢𝐨 𝐝𝐚 𝐒𝐢𝐥𝐯𝐚, ne’ebé reprezenta Presidente Autoridade Munisípiu Dili (PAM), partisipa iha lansamentu ofisiál 𝐋𝐨𝐫𝐨𝐓𝐞𝐥 𝐒𝐨𝐥𝐮𝐭𝐢𝐨𝐧𝐬 𝐔𝐧𝐢𝐩𝐞𝐬𝐬𝐨𝐚𝐥, 𝐋𝐝𝐚., Provedór Servisu Internet (ISP) iha Timor-Leste, ne’ebé hala’o iha Fatuhada, Postu Administrativu Dom Aleixo.
Lansamentu ne’e marka prezensa husi 𝐏𝐫𝐢𝐦𝐞𝐢𝐫𝐮-𝐌𝐢𝐧𝐢𝐬𝐭𝐫𝐮 𝐊𝐚𝐲 𝐑𝐚𝐥𝐚 𝐗𝐚𝐧𝐚𝐧𝐚 𝐆𝐮𝐬𝐦ã𝐨 no reprezentante husi Ministériu Transportes no Telekomunikasaun, hamutuk ho membru Governu no konvidadu sira, hodi marka komitmentu Lorotel atu fornese konektividade internet ba komunidade.
Diretór Ezekutivu LoroTel (CEO), 𝐋𝐮𝐜𝐢𝐨 𝐂. 𝐆. 𝐂𝐚𝐫𝐝𝐨𝐬𝐨 iha nia intervensaun, hateten katak LoroTel hahú nia misaun iha Dezembru 2024, ho objetivu atu lori internet ne’ebé asesível, konfiável no besik liután ba komunidade. “LoroTel hahú ona nia misaun durante tinan ida resin, husi fulan Dezembru 2024, hodi lori internet ne’ebé asesível, konfiável no besik liután ba komunidade,” nia hateten. Nia mós afirma katak teknolojia sai nu’udar ponte ba edukasaun, informasaun no oportunidade, no LoroTel iha responsabilidade atu aproxima konektividade ba komunidade no kontinua kontribui ba dezenvolvimentu nasaun.
LoroTel Solutions Unipessoal, Lda. mak kompañia Provedór Servisu Internet (ISP) ne’ebé fornese servisu internet/Wi-Fi iha Timor-Leste, ho enderesu iha Fatuhada, Dom Aleixo, Dili. Kompanhia ne’e hetan Sertifikadu Rejistu ISP husi Autoridade Nasional Komunikasaun (ANC) iha 23 Juñu 2025.
Fontes : (𝐌𝐞𝐝𝐢𝐚 𝐆𝐚𝐛. 𝐏𝐀𝐌)


