𝗔𝗨𝗧𝗢𝗥𝗜𝗗𝗔𝗗𝗘 𝗠𝗨𝗡𝗜𝗦𝗣𝗜𝗨 𝗗𝗜𝗟𝗜, 𝗔𝗣𝗘𝗟𝗔 𝗕𝗔 𝗞𝗢𝗠𝗨𝗡𝗜𝗗𝗔𝗗𝗘 𝗛𝗢𝗧𝗨 𝗜𝗛𝗔 𝗞𝗔𝗣𝗜𝗧𝗔𝗟 𝗗𝗜𝗟𝗜, 𝗛𝗢𝗗𝗜 𝗟𝗔𝗕𝗘𝗟𝗘 𝗛𝗨𝗦𝗜𝗞 𝗣𝗜𝗣𝗔 𝗦𝗜𝗡𝗧𝗜𝗡𝗔 𝗡𝗜𝗔𝗡 𝗕𝗔 𝗩𝗔𝗟𝗘𝗡𝗧𝗔 𝗡𝗢 𝗠𝗢𝗧𝗔 𝗟𝗔𝗥𝗔𝗡

𝗗𝗶𝗹𝗶, 𝟴 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲

Autoridade Munisípiu Díli (AMD) apela ba komunidade sira hotu ne’ebé hela iha área urbana Díli, atu fó atensaun no responsabilidade ba higiene no saneamentu iha ambiente.

AMD observa katak sei iha prátika husi komunidade balu ne’ebé husik pipa sintina nian diretamente ba valeta, mota-laran ka sistema drenajen públiku, no la iha sistema possu sintina ne’ebé apropriadu hanesan hatudu dadaun iha imajen ne’e. Prátika hanesan ne’e bele hamosu fo’er, kontaminasaun ambiente no aumenta risku ba moras ne’ebé bele afeta saúde komunidade.

Ambiente moos no saudavel la depende de’it ba governu ka autoridade, maibé hahú husi konsiénsia no responsabilidade ida-idak nian. Se komunidade hakarak moris iha ambiente ne’ebé moos furak no saudavel, tenke kontribui hodi evita hahalok ne’ebé bele fó impaktu ba ambiente no saúde ema seluk.

AMD apela ba komunidade sira atu labele husik pipa sintina diretamente ba valeta ka mota-laran, no asegura katak Possu sintina iha uma ida-idak tenke apropriadu.

AMD sei kontinua hala’o fiskalizasaun no monitorizasaun iha territóriu Munisípiu Díli, ba ema ka komunidade ne’ebé viola regra no kontinua husik bee sintina ba valeta ka mota-laran, AMD sei aplika sansaun rigorozu ba komunidade refere.

“Ita-nia ambiente, ita-nia responsabilidade”

𝗜𝘁𝗮 𝗵𝗮𝗺𝘂𝘁𝘂𝗸 𝗵𝗮𝗺𝘂𝗿𝗮𝗸 𝗗í𝗹𝗶, 𝗺𝗼𝗼𝘀 𝗳𝘂𝗿𝗮𝗸 𝗻𝗼 𝘀𝗮𝘂𝗱𝗮𝘃𝗲𝗹.”

Fontes : (𝗠é𝗱𝗶𝗮 𝗚𝗮𝗯. 𝗣𝗔𝗠)