𝐃𝐢𝐥𝐢, 𝟎𝟖 𝐉𝐮ñ𝐮 𝟐𝟎𝟐𝟔

Servisu Munisipál Protesaun Sivil no Jestaun Dezastre Naturais (SMPC-GDN) hamutuk ho Autoridade Protesaun Sivil (APC) hala’o atividade kampaña sensibilizasaun ba autoridade lokal no komunidade kona-ba jestaun risku dezastre naturais no papel bombeiru sira ba komunidade iha Aldeia Kasnafar, Suku Dare, Postu Administrativu Vera Cruz, Munisípiu Dili.

Atividade ne’e lidera husi Diretór SMPC-GDN, Sr. Jacinto Freitas, no hetan akompañamentu husi Administradora Postu Administrativu Vera Cruz, Sra. Tereza da Costa Mariano, Komandante Operasional APC, Sr. Cláudio da Silva, Xefe Suku Dare, Sr. Inásio D. Carvalho, no Komandante OPS, Sr. José dos Santos.

Objetivu husi kampaña sensibilizasaun ne’e maka atu hasa’e konhesimentu komunidade kona-ba medidas prevensaun no preparasaun hasoru dezastre naturais, nune’e komunidade bele responde ho lalais no efetivu atu minimiza impaktu risku sira ne’ebé bele akontese iha futuru.

Iha abertura atividade ne’e, Administradora Postu Administrativu Vera Cruz, Sra. Tereza da Costa Mariano, hato’o importánsia sensibilizasaun no edukasaun ba komunidade atu aumenta preparasaun no kapasidade responde bainhira hasoru risku dezastre naturais iha sira-nia área.

Liuhusi atividade ida ne’e, SMPC-GDN no APC reafirma sira-nia kompromisu atu kontinua hametin kooperasaun ho autoridade lokal no komunidade sira hodi harii komunidade ne’ebé prontu, reziliente no preparadu hasoru risku dezastre naturais.

Partisipa mos iha atividade refere komunidade Aldeia Kasnafar, membru Konsellu Suku, delegadu no xefe aldeia sira, xefe suku, funsionáriu Autoridade Munisípiu Dili no APC Nasionál.