𝐃𝐢𝐥𝐢, 𝟖 𝐉𝐮ñ𝐮 𝟐𝟎𝟐𝟔

Ekipa limpeza Esgotu husi Autoridade Munisípiu Dili kontinua hala’o servisu limpeza no hamos lixu iha área Mota Komoro nu’udar parte husi programa manutensaun ambientál no mitigasaun risku inundasaun iha munisípiu ne’e.

Atividade ne’e fokus ba hasai lixu no material sira ne’ebé taka dalan bee nian, atu asegura bee bele suli ho di’ak no la hamosu problema inundasaun durante tempu udan. Servisu ne’e mos importante atu preserva limpeza mota nian, proteje ekosistema no hadi’a saúde públika ba komunidade sira ne’ebé hela iha area mota ninin.

Ekipa Esgotu hatudu komitmentu aas hodi hala’o knaar ho responsabilidade no dedikasaun, maski enfrenta dezafiu sira iha terrenu. Husi atividade ne’e, bele haree esforsu governu lokal atu kria ambiente ne’ebé moos, saudavel no seguru ba sidadaun hotu.

Autoridade Munisípiu Dili apela ba komunidade atu labele soe lixu iha mota, valeta ka fatin públiku sira seluk, tanba limpeza no sustentabilidade ambientál presiza kontribuisaun husi ema hotu.