Autoridade Munisípiu Dili hala’o treinamentu kona-ba Estabilizasaun no Modernizasaun Sistema Koleksaun Dadus Estatístika Vital no Rejistu Sivil (CVRS) iha Timor-Leste, ne’ebé realiza iha Salaun B Autoridade Munisípiu Dili (AMD).

Treinamentu ne’e fornese husi Institutu Nasionál de Estatístika Timor-Leste, IP (INE-IP) ho objetivu atu hasa’e kapasidade téknika ba funsionáriu sira ne’ebé envolve diretamente iha prosesu rekolla, jestaun no atualizasaun dadus CVRS. Atividade ne’e importante tebes hodi asegura katak sistema rejistu sivil no estatístika vital iha Timor-Leste bele lao ho efisiente, modernu no responde ba nesesidade dezenvolvimentu nasional.

Liuhosi formasaun ida ne’e, partisipante sira hetan koñesimentu kona-ba métodu no prosedimentu foun sira iha koleksaun dadus, utilizasaun teknolojia informasaun, no mekanizmu atu garante qualidade no integridade dadus. Espera katak rezultadu husi treinamentu ne’e bele kontribui ba hadi’a servisu públiku no apoiu prosesu planeamentu no tomada desizaun baseada ba dadus ne’ebé lolos no atualizadu.

Treinamentu ne’e mos reflete kompromisu governu atu kontinua fortalese sistema CVRS nu’udar baze importante ida ba planeamentu dezenvolvimentu no prestasaun servisu ba komunidade sira iha Timor-Leste.

(𝐌é𝐝𝐢𝐚 𝐆𝐚𝐛. 𝐏𝐀𝐌)