𝐃í𝐥𝐢, 𝟏𝟖 𝐉𝐮ñ𝐮 𝟐𝟎𝟐𝟔

Kinta Feira ne’e, Komisaun Anti Korupsaun (CAC-sigla Português) hala’o sensibilizasaun kona-ba implementasaun Lei Númeru 7/2020 kona-ba Medidas Prevensaun no Kombate Korupsaun, ba Funsionariu Públiku no lider komunitária sira iha Autoridade Munisipiu Dili (AMD) ho objetivu atu hasa’e koñesimentu no konsiénsia funsionáriu públiku sira kona-ba importánsia integridade, transparénsia no responsabilidade iha servisu públiku.

Atividade sensibilizasaun Lei Nu. 7/2020 – MPCC durante loron tomak ne’e ofisialmente loke husi Prezidente Autoridade Munisípiu (PAM) Dili, Sr. Francisco dos Santos ho tema “hasa’e koñesimentu ba Ajénte Públiku no setór privadu kona-ba papél CAC no enkuadramentu legál sira”.

Durante abertura atividade refere, 𝐏𝐫𝐞𝐳𝐢𝐝𝐞𝐧𝐭𝐞 𝐀𝐮𝐭𝐨𝐫𝐢𝐝𝐚𝐝𝐞 𝐌𝐮𝐧𝐢𝐬í𝐩𝐢𝐮 (𝐏𝐀𝐌) 𝐃𝐢𝐥𝐢, 𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬, agradese ba CAC tanba bele mai iha AMD hodi sensibiliza lei Númeru 7/2020 kona-ba Medidas Prevensaun no Kombate Korupsaun ba Funsionáriu Públiku no lider komunitária sira hodi nune’e funsionáriu sira bele servisu ho di’ak no labele servisu fora husi ritmu Governu nian.

“Autoridade Munisípiu Dili apresia tebes inisiativa husi Komisaun Anti Korupsaun ne’ebé mai fahe koñesimentu kona-ba Lei Númeru 7/2020 – Medidas Prevensaun no Kombate Korupsaun.

Sensibilizasaun ida ne’e importante tebes atu hasa’e konsiénsia no responsabilidade funsionáriu públiku, lider komunitária no parseiru sira hotu atu hala’o servisu ho transparénsia no responsabilidade” Dehan PAM.

Iha atividade refere, Komisáriu CAC, Rui Pereira mós aprezenta papél CAC nian iha servisu prevensaun no investigasaun krime korrupsaun nian, enkuantu 𝐊𝐨𝐦𝐢𝐬𝐚𝐫𝐢𝐮 𝐀𝐝𝐣𝐮𝐧𝐭𝐮 𝐊𝐨𝐦𝐢𝐬𝐚𝐮𝐧 𝐀𝐧𝐭𝐢 𝐊𝐨𝐫𝐫𝐮𝐩𝐬𝐚𝐮𝐧 (𝐂𝐀𝐂) 𝐑𝐨𝐬𝐚𝐫𝐢𝐨 𝐀𝐫𝐚𝐮𝐣𝐨, aprezenta kona-ba Lei Medida Prevensaun no Kombate Korrupsaun.

Komisáriu CAC, Rui Pereira iha nia intervensaun hato’o katak, atividade sensibilizasaun ne’e relevante ho prosesu implementasaun polítika desentralizasaun no podér lokál iha Timor-Leste.

Ho transferénsia kompeténsia no rekursu públiku ba nivel munisipál, presiza iha komprensaun ne’ebé di’ak kona-ba prinsípiu boa governasaun no mekanizmu prevensaun korrupsaun atu garante katak programa no atividade sira bele implementa ho responsabilidade no transparénsia.

“Na’in hira, ohin ita hamutuk iha ne’e, tanba ita hakarak fahe hanoin balun ba ita boot sira ligadu ho boa governasaun nian. Na’in hira hatene katak, Dili ne’e sentru ba administrasaun públika no ekonomia nasaun nian. Entaun risku korrupsaun ne’e barak liu iha ne’e. Entaun ita mai halo sensibilizasaun atu fó hanoin nafatin liuliu ita-nia na’i xefe suku sira atu jere ita-nia osan Estadu ho loloos”, dehan Komisariu Rui.

Komisáriu Rui hatutan katak, CAC no Ministeriu Administrasaun Estatal (MAE) asina ona kontratu inter-administrativu ida, ne’ebé sei servisu hamutuk hodi prevene no kombate korrupsaun, liuhusi utiliza rekursu Balkaun Uniku hodi halo denunsia publika no rejista deklarasaun rendimentu, bens no interese.

Atividade sensibilizasaun ida ne’e sai nu’udar oportunidade importante atu hasa’e komprensaun partisipante sira kona-ba oinsá prevene no kombate korrupsaun, no habelar responsabilidade hamutuk atu kria administrasaun públika ida ne’ebé los, transparente no responde ba interese povu nian.

Autoridade Munisipál Dili reafirma nia kompromisu atu kontinua apoiu esforsu Governu no CAC iha promosaun boa governasaun, integridade institusionál no servisu públiku ne’ebé livre husi prátika korrupsaun.

Fontes : (𝗠é𝗱𝗶𝗮 𝗚𝗮𝗯. 𝗣𝗔𝗠)