𝗕𝗮𝗹𝗶𝗯𝗮𝗿, 𝗗𝗶𝗹𝗶, 𝟮𝟬 𝗝𝘂ñ𝘂 𝟮𝟬𝟮𝟲

Prezidente Autoridade Munisípiu Dili (PAM), 𝗦𝗿. 𝗙𝗿𝗮𝗻𝗰𝗶𝘀𝗰𝗼 𝗱𝗼𝘀 𝗦𝗮𝗻𝘁𝗼𝘀, ofisialmente hala’o lansamentu primeira pedra ba projetu Konstrusaun Edifísiu ba Doutór sira iha Klínika Balibar, no simultaneamente lansa projetu Programa Dezenvolvimentu Integradu Munisipál (PDIM) 2026 hamutuk 12 iha Suku Balibar, Postu Administrativu Kristu Rei. Inisiativa ida ne’e ho objetivu atu responde ba nesesidade komunidade, hasa’e asesu ba servisu saúde no promove dezenvolvimentu sustentavel iha área refere.

Atividade ne’e hetan partisipasaun husi Sekretáriu Munisípiu na’in rua, diretores no diretoras Autoridade Munisípiu Dili, Administrador Postu Administrativu Kristu Rei no Metinaro, Komandante no membru PNTL Eskuadra Kristu Rei, autoridade lokál sira no komunidade Suku Balibar.

Iha nia intervensaun, PAM Dili hateten katak Autoridade Munisípiu Dili kontinua implementa projetu sira tuir prioridade no nesesidade ne’ebé identifika husi komunidade liu husi prosesu planeamentu partisipativu. Nia esplika katak proposta atu harii edifísiu ba doutór sira iha Balibar mai husi autoridade lokál no komunidade sira durante prosesu planeamentu tinan anteriór.

“Projetu ida ne’e importante tebes tanba sei kria kondisaun ne’ebé di’ak liu ba pesoál saúde sira atu hala’o sira-nia servisu, nune’e bele aumenta asesibilidade no efisiénsia servisu saúde ba komunidade Balibar no área sira seluk ne’ebé hela besik,” hatete PAM Dili

Nia mós hateten katak lansamentu projetu PDIM 12 iha Postu Administrativu Kristu Rei reflete komitmentu Governu no Autoridade Munisípiu Dili atu kontinua investe iha infraestrutura no servisu básiku sira ne’ebé iha impaktu direta ba moris povu nian.

Relasiona ho implementasaun projetu sira ne’e, PAM Dili husu ba kompañia sira ne’ebé hetan konfiansa atu ezekuta servisu hodi kumpri rigorozamente kalendáriu servisu, padraun tékniku no dispozisaun sira ne’ebé temi ona iha kontratu no termu aseitasaun.

“Ami konsidera kompañia sira nu’udar parseiru estratéjiku iha esforsu dezenvolvimentu. Tanba ne’e, ami hein katak projetu sira ne’e bele implementa ho kualidade, remata tuir tempu ne’ebé determina ona no lori benefísiu direta ba komunidade,” subliña PAM

Projetu Konstrusaun Edifísiu ba Doutór no Klínika Balibar ne’ebé lansa iha loron ne’e hetan orsamentu hamutuk USD 129,379.29, ho durasaun servisu fulan tolu, no sei implementa husi kompañia Lemizo Joel Unip, Lda. Espera katak, depois de remata, infraestrutura ne’e bele kontribui atu hasa’e kualidade servisu saúde no hadi’a bem-estar komunidade iha Suku Balibar.

Lansamentu primeira pedra no projetu PDIM 12 ne’e marka komitmentu kontinua husi Autoridade Munisípiu Dili atu promove dezenvolvimentu inkluzivu no sustentavel, liu husi implementasaun projetu sira ne’ebé responde diretamente ba nesesidade no aspirasaun komunidade sira iha Munisípiu Dili.

Fontes : (𝗠é𝗱𝗶𝗮 𝗚𝗮𝗯. 𝗣𝗔𝗠)