𝐏𝐀𝐌 𝐃𝐈𝐋𝐈 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐋𝐀𝐍𝐒𝐀𝐌𝐄𝐍𝐓𝐔 𝐎𝐅𝐈𝐒𝐈Á𝐋 𝐑Ó 𝐏𝐄𝐒𝐊𝐀 𝐇𝐎𝐃𝐈 𝐇𝐀𝐅𝐎𝐑𝐒𝐀 𝐃𝐄𝐙𝐄𝐍𝐕𝐎𝐋𝐕𝐈𝐌𝐄𝐍𝐓𝐔 𝐒𝐄𝐓Ó𝐑 𝐏𝐄𝐒𝐊𝐀 𝐍𝐀𝐒𝐈𝐎𝐍𝐀𝐋

17 July 2026

𝐃𝐢𝐥𝐢, 𝟏𝟕 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisípiu (PAM) Dili, Sr. Francisco dos Santos, partisipa iha serimónia lansamentu ofisiál Ró Peska ba Fundu Investimentu Estratéjiku, ne’ebé organiza husi Konsellu Kombatente Libertasaun Nasionál (CCLN) iha Portu Dili, Sesta-feira (17/07).

Serimónia ne’e lidera husi Prezidente Administrasaun CCLN, Vidal de Jesus “Riak Leman”, hamutuk Ministru Asuntu Kombatente Libertasaun Nasionál (ACLN), Gil da Costa Monteiro “Oan Soru”, Exelénsia, Vise-Primeiru-Ministru no Ministru Koordenador Asuntu Sosiais, Mariano Assanami Sabino, Exelénsia Ministru Agrikultura Pekuaria Peska no Floresta Sr. Marcos da Cruz ho reprezentante Governu, Autoridade Estadu, Forsa Defeza no Seguransa, no konvidadu sira seluk.

Lansamentu ró peska ne’e nia objetivu mak atu haforsa kapasidade setór peska nasional liuhusi fornese transporte no apoiu operasionál ba peskadór sira, hodi hasa’e produtividade peska, kria oportunidade ekonomia ba komunidade peskeira, no promove jestaun rekursu tasi ne’ebé sustentável. Inisiativa ida ne’e mos reflete komitmentu atu aproveita rekursu marítimu hodi kontribui ba dezenvolvimentu ekonomia nasional no seguransa alimentár.

Iha okaziaun ne’e realiza mos serimónia kua fita ba baraku peska, bensaun, lansamentu ofisiál ró peska, no vizita ba fasilidade foun ne’ebé prepara atu suporta atividade peska.

Partisipa iha serimónia ne’e membru Governu, lideransa CCLN, reprezentante ministériu no instituisaun estadu sira, PNTL, F-FDTL, parseiru dezenvolvimentu, komunidade peskeira no konvidadu sira seluk.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐏𝐑𝐄𝐙𝐈𝐃𝐄𝐍𝐓𝐄 𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒Í𝐏𝐈𝐔 𝐃𝐈𝐋𝐈 𝐇𝐀𝐋𝐀’𝐎 𝐕𝐈𝐙𝐈𝐓𝐀 𝐓𝐑𝐀𝐁𝐀𝐋𝐇𝐎 𝐈𝐇𝐀 𝐏𝐎𝐒𝐓𝐔 𝐀𝐃𝐌𝐈𝐍𝐈𝐒𝐓𝐑𝐀𝐓𝐈𝐕𝐔 𝐃𝐎𝐌 𝐀𝐋𝐄𝐈𝐗𝐎

𝐃𝐢𝐥𝐢, 𝟏𝟔 𝐉𝐮𝐥𝐥𝐮 𝟐𝟎𝟐𝟔

𝗣𝗿𝗲𝘇𝗶𝗱𝗲𝗻𝘁𝗲 𝗔𝘂𝘁𝗼𝗿𝗶𝗱𝗮𝗱𝗲 𝗠𝘂𝗻𝗶𝘀í𝗽𝗶𝘂 𝗗𝗶𝗹𝗶, 𝗦𝗿. 𝗙𝗿𝗮𝗻𝗰𝗶𝘀𝗰𝗼 𝗱𝗼𝘀 𝗦𝗮𝗻𝘁𝗼𝘀, hala’o vizita ofisiál ba Postu Administrativu 5 iha Munisípiu Dili hahú loron 16 Jullu to’o 13 Agostu 2026, ho objetivu atu realiza diálogu komunitáriu ho Autoridade Postu Administrativu, xefe suku no xefe aldeia sira.

Vizitasaun ne’e hahú iha Postu Administrativu Dom Aleixo iha 16 Jullu 2026, tuir mai Metinaru iha 23 Jullu, Cristo Rei iha 30 Jullu, Nain Feto iha 6 Agostu, no remata iha Vera Cruz iha 13 Agostu 2026.

Iha kada Postu Administrativu, Prezidente Autoridade Munisípiu Dili sei hasoru APA sira no xefe suku no xefe aldeia hodi rona diretamente sira-nia preokupasaun, troka hanoin kona-ba dezenvolvimentu lokál no hametin koordenasaun entre Autoridade Munisípiu Dili ho lideransa komunitária.

iha oportunidade ne’e, PAM Dili ko’alia kona-ba preparasaun ba implementasaun Poder Lokal no Kámara Munisipál. Nia hateten katak prosesu desentralizasaun sei fó responsabilidade boot liu ba lideransa lokál, tanba ne’e preparasaun tenke hahú husi agora.

“Dezentralizasaun Poder Lokal nia objetivu mak oinsá atu lori governasaun besik liu komunidade. Tanba ne’e, ha’u husu ba APA, xefe suku no xefe aldeia sira atu tur hamutuk hodi halo planu dezenvolvimentu ba suku no aldeia sira. Aban-bainrua Kámara Munisipál hahú funsiona, buat barak sei depende ba preparasaun ne’ebé ita halo ohin loron. Se ita prepara di’ak husi agora, ita sei fasil liu atu responde ba nesesidade komunidade iha futuru,” hatete PAM.

PAM hatutan, diálogu komunitáriu ne’e sai oportunidade importante atu hametin koordenasaun entre Autoridade Munisípiu Dili ho lideransa lokál, nune’e Governu bele rona diretamente komunidade nia preokupasaun no hamutuk buka solusaun ba problema sira ne’ebé povu infrenta.

Reuniaun ne’e partisipa husi membru Konsellu Koordenasaun Autoridade Munisípiu Dili, inklui Secretáriu Munisipal Asuntu Sosial no Organizasaun Komunitária (SECAM III), diretór sira, Sefe Suku sira husi postu 5, Sefe Aldeia, komunidade no konvidadus sira seluk.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐆𝐎𝐕𝐄𝐑𝐍𝐔 𝐋𝐈𝐔 𝐇𝐔𝐒𝐈 𝐀𝐌𝐃 𝐇𝐀𝐌𝐔𝐓𝐔𝐊 𝐒𝐄𝐀𝐓𝐎𝐔 𝐍𝐎 𝐋𝐈Ñ𝐀 𝐌𝐈𝐍𝐈𝐒𝐓𝐄𝐑𝐈𝐀𝐋 𝐊𝐎𝐍𝐓𝐈𝐍𝐔𝐀 𝐇𝐀𝐋𝐎 𝐃𝐄𝐒𝐏𝐄𝐙𝐔 𝐀𝐃𝐌𝐈𝐍𝐈𝐒𝐓𝐑𝐀𝐓𝐈𝐕𝐔 𝐁𝐀 𝐊𝐎𝐌𝐔𝐍𝐈𝐃𝐀𝐃𝐄 𝐀𝐅𝐄𝐓𝐀𝐃𝐔 𝐏𝐑𝐎𝐉𝐄𝐓𝐔 𝐀𝐋𝐀𝐑𝐆𝐀𝐌𝐄𝐍𝐓𝐔 𝐀𝐄𝐑𝐎𝐏𝐎𝐑𝐓𝐔 𝐈𝐍𝐓𝐄𝐑𝐍𝐀𝐒𝐈𝐎𝐍Á𝐋 𝐍𝐈𝐂𝐎𝐋𝐀𝐔 𝐋𝐎𝐁𝐀𝐓𝐎

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐀𝐌𝐃 𝐊𝐎𝐍𝐓𝐈𝐍𝐔𝐀 𝐀𝐏𝐄𝐋𝐔 𝐁𝐀 𝐊𝐎𝐌𝐔𝐍𝐈𝐃𝐀𝐃𝐄 𝐀𝐓𝐔 𝐒𝐎𝐄 𝐋𝐈𝐗𝐔 𝐓𝐔𝐈𝐑 𝐅𝐀𝐓𝐈𝐍 𝐍𝐄’𝐄𝐁É 𝐏𝐑𝐄𝐏𝐀𝐑𝐀𝐃𝐔 𝐎𝐍𝐀

𝐃𝐢𝐥𝐢, 𝟏𝟓 𝐉𝐮𝐥𝐥𝐮 𝟐𝟎𝟐𝟔

Autoridade Munisípiu Dili (AMD) kontinua esforsu hodi prepara fatin kolekta lixu iha estrada ninin no bairru sira atu fasilita komunidade soe lixu tuir fatin ne’ebé governu liu husi AMD prepara ona, ho objetivu mantein ambiente ne’ebé mos, saúde públika no prezerva ambiente iha Munisípiu Dili.

Mas, hanesan hatudu iha imagem ne’e, sei iha komunidade balun ne’ebé seidauk iha konsiénsia atu uza kontentór lixu tuir ninia funsaun. Lixu barak sei soe arbiru iha rai, maski kontentór lixu iha besik fatin ne’ebá. Situasaun ida ne’e bele estraga ambiente, halo moras sai fasil no aumenta risku inundasaun wanhira iha tempu udan.

Tanba ne’e, AMD apela ba komunidade hotu-hotu atu hamutuk tau matan ba limpeza no tau ida-idak nia konsiénsia hodi soe lixu iha fatin ne’ebé preparadu ona no limpeza Munisípiu Dili la’ós de’it responsabilidade governu nian, maibé responsabilidade hamutuk entre governu no komunidade.

AMD reafirma katak sei nafatin halo servisu rekolla lixu no sensibilizasaun ba públiku, no hein katak komunidade bele kontribui ho hahalok ne’ebé di’ak atu hametin Dili sai munisípiu ida ne’ebé moos, saudavel no konfortável ba ema hotu.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐒𝐌𝐏𝐂-𝐆𝐃𝐍 𝐇𝐀𝐌𝐔𝐓𝐔𝐊 𝐇𝐎 𝐀𝐏𝐂 𝐀𝐏𝐎𝐈𝐔 𝐏𝐀𝐊𝐎𝐓𝐄 𝐄𝐌𝐄𝐑𝐉É𝐍𝐒𝐈𝐀 𝐁𝐀 𝐕𝐈𝐓𝐈𝐌𝐀 𝐔𝐌𝐀 𝐊𝐀𝐈𝐍 (𝟏𝟑) 𝐍𝐄’𝐄𝐁𝐄 𝐇𝐄𝐓𝐀𝐍 𝐈𝐍𝐒𝐄𝐍𝐃𝐈𝐔

𝐃𝐢𝐥𝐢, 𝟏𝟒 𝐉𝐮𝐥𝐥𝐮 𝟐𝟎𝟐𝟔

Servisu Munisipál Protesaun Sivíl no Jestaun Dezastre Naturál (SMPC-GDN), liu husi Diretór Jacinto Freitas no ekipa, akompaña husi Komandante Operasionál Autoridade Protesaun Sivíl (APC), Claudio da Silva ho ekipa, no Xefe Suku Fatuhada, Marcelino Soares, ohin entrega pakote emerjénsia ba família uma kain hamutuk (13) ne’ebé afetadu husi inséndiu iha Merkadu Comoro, Suku Fatuhada, Postu Administrativu Dom Aleixo.

Inséndiu ne’e akontese horseik iha segunda-feira dadeer no tuir informasaun, kauza husi sirkuít elétriku (curto-circuito). Objetivu husi apoiu Pakote emerjénsia ne’e atu ajuda família sira ne’ebé lakon hela fatin no sasán importante sira ne’ebé kauza husi dezastre refere.

Fontes : (𝐌é𝐝𝐢𝐚 𝐆𝐚𝐛 𝐏𝐀𝐌)

𝐆𝐎𝐕𝐄𝐑𝐍𝐔 𝐇𝐀𝐋𝐀’𝐎 𝐃𝐄𝐒𝐏𝐄𝐙𝐔 𝐀𝐃𝐌𝐈𝐍𝐈𝐒𝐓𝐑𝐀𝐓𝐈𝐕𝐔 𝐁𝐀 𝐊𝐎𝐌𝐔𝐍𝐈𝐃𝐀𝐃𝐄 𝐀𝐅𝐄𝐓𝐀𝐃𝐔 𝐈𝐇𝐀 𝐁𝐄𝐓𝐎 𝐌𝐀𝐑𝐈𝐍𝐈𝐑

𝐃𝐢𝐥𝐢, 𝟏𝟒 𝐉𝐮𝐥𝐥𝐮 𝟐𝟎𝟐𝟔

Governu liu husi Autoridade Munisípiu Dili (AMD), hamutuk ho Sekretariadu Estadu Asuntu Toponomia no Organizasaun Urbana (SEATOU) no liňa Ministerial, hala’o despezu administrativu ba komunidade afetadu sira iha Beto Marinir, Suku Comoro, neʼebé tama iha área dezenvolvimentu no alargamentu Aeroportu Internasionál Nicolau Lobato.

Atividade ne’e envolve kolaborasaun ho Diresaun Nasionál Terras no Propriedade, Ministériu Obras Públikas, Aeroportu no Navegasaun Timor-Leste, E.P (ANATL, E.P) no Polísia Nasionál Timor-Leste. Antes hala’o prosesu despezu, Governu liu husi instituisaun relevante sira halo ona diálogu ho komunidade afetadu sira no fó karta notifikasaun kona-ba desizaun ne’e, inklui fó prazu atu komunidade sira muda husi fatin refere

Komunidade afetadu sira iha área Beto Marinir hamutuk uma-kain 57 ne’ebé simu ona notifikasaun iha loron 19 Junu 2026. Prosesu despezu administrativu ne’e hala’o tuir prosedimentu legál atu fó dalan ba implementasaun projetu alargamentu Aeroportu Internasionál Nicolau Lobato.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐒𝐄𝐂𝐀𝐌 𝐈𝐈 𝐏𝐀𝐑𝐓𝐈𝐒𝐈𝐏𝐀 𝐄𝐍𝐊𝐎𝐍𝐓𝐑𝐔 𝐈𝐊𝐔𝐒 𝐊𝐎𝐍𝐀𝐁𝐀 𝐈𝐌𝐏𝐋𝐄𝐌𝐄𝐍𝐓𝐀𝐒𝐀𝐔𝐍 𝐃𝐄𝐒𝐏𝐄𝐉𝐔 𝐀𝐃𝐌𝐈𝐍𝐈𝐒𝐓𝐑𝐀𝐓𝐈𝐕𝐔 𝐁𝐀 𝐊𝐎𝐌𝐔𝐍𝐈𝐃𝐀𝐃𝐄 𝐒𝐈𝐑𝐀 𝐈𝐇𝐀 𝐀𝐄𝐑𝐎𝐏𝐎𝐑𝐓𝐔.

𝐃í𝐥𝐢 𝟏𝟎 𝐉𝐮𝐥𝐥𝐮 𝟐𝟎𝟐𝟔

Sekretáriu Munisípal Administrasaun Planeamentu, investimentu Dezenvolvimentu integradu (SECAM PIDI), Filomino Maria da Silva Smith, partisipa iha ultimu enkontru koordinasaun kona-ba implementasaun despeju administrativu ba komunidade sira ne’ebé hela iha área besik Aeroportu Presidente Nicolau Lobato, iha salaun enkontru Kafetária edifisiu Sentral Ministériu Justiça.

Enkontru ne’e realiza ho objetivu atu finaliza preparasaun no hametin koordinasaun entre entidade relevante sira molok implementa prosesu despeju administrativu. Iha reuniaun ne’e, partisipante sira diskute mekanizmu implementasaun, papél no responsabilidade kada instituisaun, no medida sira atu garante katak prosesu ne’e lao ho di’ak, tuir lei no regulamentu sira ne’ebé vigora.

SECAM II reafirma nia kompromisu atu kontinua servisu hamutuk ho parseiru institusionál sira hodi asegura katak implementasaun despeju administrativu ne’e bele hala’o ho maneira ordenada, transparente, no respeita direitu no dignidade komunidade afetada sira.

Autoridade Munisipiál Díli hein katak liuhusi koordinasaun ne’ebé metin entre entidade relevante sira, prosesu implementasaun bele lao ho efetivu, mantendo estabilidade, seguransa no interese públiku, nune’e mós suporta dezenvolvimentu no ordenamentu área munisipál nian.

Entertantu komunidade ne’ebé hetan despeju Administrativu hamutuk uma kain 57 inklui mos ho rate 20 , husi uma kain 57 ne’e nain 19 mak hetan ona indeminizasaun inklui mos osan kompensasaun transporte ho montante dólares 200 iha tinan 2025.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐒𝐌𝐀𝐒𝐀 𝐀𝐌𝐃 𝐇𝐀𝐋𝐀’𝐎 𝐋𝐈𝐌𝐏𝐄𝐙𝐀 𝐋𝐎𝐑𝐋𝐎𝐑𝐎𝐍 𝐈𝐇𝐀 𝐒𝐈𝐃𝐀𝐃𝐄 𝐃𝐈𝐋𝐈.

𝐃𝐢𝐥𝐢, 𝟏𝟎 𝐉𝐮𝐥𝐥𝐮 𝟐𝟎𝟐𝟔

Autoridade Munisípiu Dili (AMD), liu husi Diresaun Servisu Munisipál Água, Saneamentu no Ambiente (SMASA), nafatin hala’o limpeza loroloron iha área dili laran, Liu-liu dalan protokolu sira nomós iha bairru sira ho objetivu atu mantein ambiente sidade ne’ebé mós, organizadu no saudavel, prevene poluisaun ambientál, no mantein imagem sidade Dili ne’ebé furak.

AMD kontinua apela ba komunidade munisípiu dili hodi mantein higiene ambientál, liu husi soe lixu tuir fatin ne’ebé AMD preparadu tiha ona no evita soe lixu arbiru iha dalan ninin no valeta ka fatin públiku sira.

AMD mós husu komunidade nia komprensaun no kooperasaun hodi mantein higiene tanba sidade ne’ebé mós la’ós de’it responsabilidade governu, maibé mós presiza apoiu husi komunidade tomak

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐀𝐌𝐃 𝐋𝐈𝐔 𝐇𝐔𝐒𝐈 𝐄𝐊𝐈𝐏𝐀 𝐒𝐄𝐑𝐕𝐈𝐒𝐔 𝐋𝐈𝐌𝐏𝐄𝐙𝐀 𝐄𝐒𝐆𝐎𝐓𝐔 𝐍𝐎 𝐌𝐎𝐓𝐀 𝐋𝐀𝐑𝐀𝐍 𝐇𝐀𝐋𝐀’𝐎 𝐋𝐈𝐌𝐏𝐄𝐙𝐀 𝐑𝐄𝐆𝐔𝐋𝐀𝐑 𝐈𝐇𝐀 𝐀𝐑𝐄𝐀 𝐃𝐈𝐋𝐈 𝐋𝐀𝐑𝐀𝐍.

𝐃𝐢𝐥𝐢, 𝟏𝟎 𝐉𝐮𝐥𝐥𝐮 𝟐𝟎𝟐𝟔

Atividade limpeza regulár ne’ebé hala’o husi ekipa servisu Limpeza Esgotu no Mota Laran kontinua la’o loroloron iha área dili laran ho objetivu hasai lixu sira ne’ebé akumula iha valeta no mota laran ne’ebé bele fó impaktu ba komunidade sira iha tempu udan ne’ebé bele hamosu inundasaun no provoka lori moras ba komunidade sira ne’ebé hela besik.

Ho nune’e AMD liu husi ekipa servisu limpeza esgotu no mota laran garantia katak liu husi servisu limpeza ne’ebé hala’o bele mantein no garante bee la’o di’ak, hamenus risku inundasaun durante tempu udan no prevene mós propagasaun moras ne’ebé bele mosu husi ambiente ne’ebé la higiene.

AMD nafatin husu ba komunidade munisípiu dili atu tau iha ida-idak nia konsiénsia humana hodi soe lixu tuir fatin ne’ebé AMD prepara ona iha kada bairru hodi labele soe fo’er iha fatin ne’ebé arbiru, tanba ambiente ne’ebé mós no saudavel fila fali ba konsiénsia komunidade nian.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)

𝐀𝐌𝐃 𝐑𝐄𝐀𝐋𝐈𝐙𝐀 𝐄𝐍𝐊𝐎𝐍𝐓𝐑𝐔 𝐄𝐗𝐓𝐑𝐀 𝐎𝐑𝐃𝐈𝐍𝐀𝐑𝐈𝐔 𝐊𝐎𝐍𝐀-𝐁𝐀 𝐒𝐄𝐆𝐔𝐍𝐃𝐀 𝐀𝐕𝐀𝐋𝐈𝐀𝐒𝐀𝐔𝐍 𝐁𝐀 𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒𝐈𝐏Á𝐋 𝐍𝐈𝐀𝐍

𝐃í𝐥𝐢 𝟎𝟕 𝐉𝐮𝐥𝐥𝐮 𝟐𝟎𝟐𝟔

Enkontru extra ordinariu segunda avaliasaun ba Autoridade Munisipál ne’e realiza ho objetivu atu fó hanoin no harmoniza komprensaun entre parte hotu kona-ba mekanizmu no prosedimentu prienximentu kestionáriu, atu asegura katak dadus ne’ebé submete sei loos, kompletu no tuir orientasaun ofisiál husi MAE.

Objetivu husi avaliasaun ne’e atu hare no forma Sistemátika kapasidade institusional, administrativu, Tékniku no operasional Autoridade Munisípiu, no mos atu identifika forsa, lakunas nesesidade apoiu tékniku no prioridade kapasitasaun ba progresu desentralizasaun administrative no preparasaun ba poder lokal.

Tuir PAM nia orientasaun katak, AMD tenki esforsu an hodi priense formaliu avaliasaun ne’e bazeia ba iha realidade no tenki fornese ho dadus konkreta.

Tanba ne’e, PAM husu ba iha ekipa ne’ebe maka sei lidera husi SECAM-II AMD nian atu servisu ho ekipa tekniku AMD nian inklui Servisu Munisipal sira ne’ebe maka sei fornese dadus hodi aselera no kompri tempu ne’ebe maka Ministeriu Administrasaun Estatal determina ona iha dia 10 Jullu 2026.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)