𝐆𝐎𝐕𝐄𝐑𝐍𝐔 𝐇𝐀𝐋𝐀’𝐎 𝐃𝐄𝐒𝐏𝐄𝐙𝐔 𝐀𝐃𝐌𝐈𝐍𝐈𝐒𝐓𝐑𝐀𝐓𝐈𝐕𝐔 𝐁𝐀 𝐊𝐎𝐌𝐔𝐍𝐈𝐃𝐀𝐃𝐄 𝐀𝐅𝐄𝐓𝐀𝐃𝐔 𝐈𝐇𝐀 𝐁𝐄𝐓𝐎 𝐌𝐀𝐑𝐈𝐍𝐈𝐑

𝐃𝐢𝐥𝐢, 𝟏𝟒 𝐉𝐮𝐥𝐥𝐮 𝟐𝟎𝟐𝟔

Governu liu husi Autoridade Munisípiu Dili (AMD), hamutuk ho Sekretariadu Estadu Asuntu Toponomia no Organizasaun Urbana (SEATOU) no liňa Ministerial, hala’o despezu administrativu ba komunidade afetadu sira iha Beto Marinir, Suku Comoro, neʼebé tama iha área dezenvolvimentu no alargamentu Aeroportu Internasionál Nicolau Lobato.

Atividade ne’e envolve kolaborasaun ho Diresaun Nasionál Terras no Propriedade, Ministériu Obras Públikas, Aeroportu no Navegasaun Timor-Leste, E.P (ANATL, E.P) no Polísia Nasionál Timor-Leste. Antes hala’o prosesu despezu, Governu liu husi instituisaun relevante sira halo ona diálogu ho komunidade afetadu sira no fó karta notifikasaun kona-ba desizaun ne’e, inklui fó prazu atu komunidade sira muda husi fatin refere

Komunidade afetadu sira iha área Beto Marinir hamutuk uma-kain 57 ne’ebé simu ona notifikasaun iha loron 19 Junu 2026. Prosesu despezu administrativu ne’e hala’o tuir prosedimentu legál atu fó dalan ba implementasaun projetu alargamentu Aeroportu Internasionál Nicolau Lobato.

                              

𝐃í𝐥𝐢 𝟏𝟎 𝐉𝐮𝐥𝐥𝐮 𝟐𝟎𝟐𝟔

Sekretáriu Munisípal Administrasaun Planeamentu, investimentu Dezenvolvimentu integradu (SECAM PIDI), Filomino Maria da Silva Smith, partisipa iha ultimu enkontru koordinasaun kona-ba implementasaun despeju administrativu ba komunidade sira ne’ebé hela iha área besik Aeroportu Presidente Nicolau Lobato, iha salaun enkontru Kafetária edifisiu Sentral Ministériu Justiça.

Enkontru ne’e realiza ho objetivu atu finaliza preparasaun no hametin koordinasaun entre entidade relevante sira molok implementa prosesu despeju administrativu. Iha reuniaun ne’e, partisipante sira diskute mekanizmu implementasaun, papél no responsabilidade kada instituisaun, no medida sira atu garante katak prosesu ne’e lao ho di’ak, tuir lei no regulamentu sira ne’ebé vigora.

SECAM II reafirma nia kompromisu atu kontinua servisu hamutuk ho parseiru institusionál sira hodi asegura katak implementasaun despeju administrativu ne’e bele hala’o ho maneira ordenada, transparente, no respeita direitu no dignidade komunidade afetada sira.

Autoridade Munisipiál Díli hein katak liuhusi koordinasaun ne’ebé metin entre entidade relevante sira, prosesu implementasaun bele lao ho efetivu, mantendo estabilidade, seguransa no interese públiku, nune’e mós suporta dezenvolvimentu no ordenamentu área munisipál nian.

Entertantu komunidade ne’ebé hetan despeju Administrativu hamutuk uma kain 57 inklui mos ho rate 20 , husi uma kain 57 ne’e nain 19 mak hetan ona indeminizasaun inklui mos osan kompensasaun transporte ho montante dólares 200 iha tinan 2025.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

 

𝐃𝐢𝐥𝐢, 𝟏𝟎 𝐉𝐮𝐥𝐥𝐮 𝟐𝟎𝟐𝟔

Autoridade Munisípiu Dili (AMD), liu husi Diresaun Servisu Munisipál Água, Saneamentu no Ambiente (SMASA), nafatin hala’o limpeza loroloron iha área dili laran, Liu-liu dalan protokolu sira nomós iha bairru sira ho objetivu atu mantein ambiente sidade ne’ebé mós, organizadu no saudavel, prevene poluisaun ambientál, no mantein imagem sidade Dili ne’ebé furak.

AMD kontinua apela ba komunidade munisípiu dili hodi mantein higiene ambientál, liu husi soe lixu tuir fatin ne’ebé AMD preparadu tiha ona no evita soe lixu arbiru iha dalan ninin no valeta ka fatin públiku sira.

AMD mós husu komunidade nia komprensaun no kooperasaun hodi mantein higiene tanba sidade ne’ebé mós la’ós de’it responsabilidade governu, maibé mós presiza apoiu husi komunidade tomak

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)

𝐃í𝐥𝐢 𝟎𝟕 𝐉𝐮𝐥𝐥𝐮 𝟐𝟎𝟐𝟔

Enkontru extra ordinariu segunda avaliasaun ba Autoridade Munisipál ne’e realiza ho objetivu atu fó hanoin no harmoniza komprensaun entre parte hotu kona-ba mekanizmu no prosedimentu prienximentu kestionáriu, atu asegura katak dadus ne’ebé submete sei loos, kompletu no tuir orientasaun ofisiál husi MAE.

Objetivu husi avaliasaun ne’e atu hare no forma Sistemátika kapasidade institusional, administrativu, Tékniku no operasional Autoridade Munisípiu, no mos atu identifika forsa, lakunas nesesidade apoiu tékniku no prioridade kapasitasaun ba progresu desentralizasaun administrative no preparasaun ba poder lokal.

Tuir PAM nia orientasaun katak, AMD tenki esforsu an hodi priense formaliu avaliasaun ne’e bazeia ba iha realidade no tenki fornese ho dadus konkreta.

Tanba ne’e, PAM husu ba iha ekipa ne’ebe maka sei lidera husi SECAM-II AMD nian atu servisu ho ekipa tekniku AMD nian inklui Servisu Munisipal sira ne’ebe maka sei fornese dadus hodi aselera no kompri tempu ne’ebe maka Ministeriu Administrasaun Estatal determina ona iha dia 10 Jullu 2026.

   

𝐃í𝐥𝐢, 𝟖 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisipál (PAM) Dili, Sr. Francisco dos Santos, hala’o enkontru ho Adida ba Kooperasaun Embaixada Portugés iha Díli, Dra. Ana Pereira, hamutuk ho Presidente da Construção Pública de Portugal no nia ekipa tékniku, hodi ko’alia kona-ba inísiu prosesu dezeñu no konstrusaun Eskola Portuguesa Dili foun iha Kaikoli.

Ekipa ne’e kompostu husi Eng. Nuno Catarro, Diretor Geral de Investimento da Empresa; Eng. Mário Coelho, Diretor da Área da Obra (Obras da Educação); no Arquiteto Tiago Rocha, Diretor da Área do Projetu. Projetu ne’e realiza tuir mandatu husi Ministériu Edukasaun Portugés, no enkontru ne’e hala’o iha Salaun A Autoridade Munisipál Dili (AMD).

Durante enkontru, parte rua mós reafirma importánsia kooperasaun institusionál entre Portugál no Timor-Leste liuhusi investimentu iha setór edukasaun, atu kontribui ba dezenvolvimentu rekursu umanu no promosaun língua portugés hanesan língua ofisiál.

PAM Dili informa katak terenu ba projetu ne’e atribui husi Ministériu Justisa, no prosesu lisensiamentu inklui serimónia kulturál sei hala’o tuir kostume no tradisaun lokál. PAM Dili mós husu atu konsidera prioridade ba traballadór timoroan sira ne’ebé hela besik área konstrusaun, proposta ne’ebé sei hetan konsiderasaun husi Embaixada Portugés no Construção Pública de Portugal.

Prezidente Autoridade Munisipál Dili reafirma kompromisu atu fó apoiu tomak ba implementasaun projetu ne’e hodi garante prosesu konstrusaun la’o di’ak no tuir planu. Projetu Escola Portuguesa Dili foun mós previstu sei iha gabinete médiku no enfermajen atu fó atendimentu saúde ba estudante no profesór sira, no espera bele sai fatin importante ida atu hasa’e kualidade edukasaun no hametin utilizasaun língua portugés iha Timor-Leste.

Durante enkontru ne’e, parte rua konfirma katak estudu preparatóriu ba projetu sei hahú iha tinan 2026, tuir fali konkursu ba dezeñu no konstrusaun iha 2027. Obra ne’e previstu remata iha tinan 2029, atu atividade letiva bele hahú iha fulan Setembru tinan ne’ebá. Eskola ne’e sei akomoda estudante hamutuk rihun rua (2.000), ho sala aula hamutuk 70, husi ensinu pré-eskolár to’o ensinu sekundáriu. Governu Portugés aprova ona orsamentu hamutuk US$22 millaun liuhusi Orsamentu Jerál Estadu Portugés atu finansia projetu ne’e.

  

𝐃í𝐥𝐢 𝟎𝟕 𝐉𝐮𝐥𝐥𝐮 𝟐𝟎𝟐𝟔

Autoridade Munisípiu Díli (AMD) hamutuk ho World Food Programme (WFP) realiza enkontru ho autoridade lokal sira hodi koordena no diskute implementasaun Programa Merenda Eskolar iha Munisípiu Díli, ne’ebe hetan partisipasaun husi reprejentante Ministeriu Administrasaun Estatal, no reprejentante husi Ministeriu edukasaun.

Enkontru ne’e atu hametin serbisu hamutuk entre governu, WFP no autoridade lokal sira hodi garante programa merenda eskolar bele implementa ho efetivu no fó benefísiu ba estudante sira. Programa ne’e importante atu apoia nutrisaun labarik sira, hasa’e motivasaun aprendizajen no kontribui ba dezenvolvimentu rekursu umanu iha futuru.

AMD no WFP kontinua komprometidu atu servisu hamutuk ho parseiru hotu-hotu hodi asegura programa ida ne’e lao ho di’ak no fó impaktu positivu ba labarik sira.

Reprejentante WFP Ali Ahmad Khan hateten, WFP hetan orientasaun husi Ministériu atu hodi envolve mos Autoridade lokal sira nune’e bele fahe informasaun ba sira konaba oinsa bele produz produtu lokal ne’ebe bele uza iha Programa Merenda Eskolar nian, atu nune’e ba oin produtu sira laos deit iha loja maibe ita nia Agrikultur sira bele fa’an direita ba iha Eskola.

WFP hanesan agensia ida ne’ebe prontu apoiu iha nivel Ministerial no nivel Munisipál sira, atu oinsa bele hasae liu tan kapasidade iha implementasaun Programa Merenda Eskolar no iha objetivu atu investe ba labarik sira tamba sira mak future nasaun nian, ho nune’e depois de advokasia ida ne’e WFP sei halao treinamentu ida ba iha grupo Agrikultor sira ne’ebe mak antes ne’e ita hahu ona iha semana kotuk ba estensionista sira hodi fo hanoin ba sira oinsa atu produz no fan produtu ne’ebe iha ba eskola.

Iha fatin hanesan Reprejentante Ministériu Administrasaun Estatal, Sra. Maria hateten, aktividade akvokasia ne’e tuir lolos hahu uluk depois mak sesaun formasaun hodi bele hetan aprosimasaun husi Membru Konsellu Konsultivu Munisipal sira, atu nune’e ba iha grupu estensionista sira bele iha hanoin diak liu oinsa mak bele mellora ita nia Programa Merenda Eskolar.

“Enkontru advokasia ne’e hanesan orientasaun husi S.E. Ministru tamba hakarak envolvimentu barak liu husi ita nia nai Sefe Suku sira tamba sira mak besik liu ba komunidade, entaun iha momentu inportante ne’e ita hotu hakarak atu mellora diak liu tan produtu lokal iha Programa Merende Eskolar hodi nune’e aihan ne’ebe ita nia oan sira konsumu lor-loron bele fo benefisiu ne’ebe diak ba sira nia Saúde, tamba ne’e bainhira to iha faze diskusaun husu ba ita bo’ot sira atu hato’o preokupasaun, tamba ita hatene katak situasaun ne’e ita hasoru maka iha faze produsaun nian, produsaun aihan iha Munisipiu Dili kompara ho Munsipiu seluk kuaze la hanesan.”

Entertantu Iha Prezidente Autoridade Minisipiu (PAM), Sr. Francisco dos Santos, ninia intervensaun hateten, ita hotu iha preokupasaun bo’ot ba Programa Merenda Eskolar ne’ebe mak seidauk máximu, tanba ne’e ita hotu esforsu hamutuk ho parseiru ne’ebe pronto atu fo apoiu. Ita nia parseiru iha estratéjia atu hodi kapasita liu liu iha grupu Agrikultor sira para hodi hasae produsaun no bele fortisfika aihan ne’ebe iha atu nune’e bele fornese nutrisaun ne’ebe diak ba ita nia oan sira.

Programa ne’e ita koalia antes ona hodi buka salusaun ne’ebe diak liu husi pasu inportante lubuk ida, atu nune’e ita bele sai husi problema ne’ebe mak ita hasoru. Programa implementasaun ba Merenda Eskola ne’ebe halao iha Dili, ita ho supervizaun ne’ebe mak extra husi parte hotu hanesan Ministériu Administrasaun Estatal, Ministeriu Eduksaun, no ekipa tékniku husi Agensia Fiskalizasaun AMD nian hodi ba terrenu atu nune’e bele hare diak liu tan programa ida ne’e.

“Matadalan Programa merenda escolar ne’e hateten katak 75% tenki uza produtu lokal, ita hatene katak persentajen ne’ebe ida ne’e laos buak ki’ik maibe ida ne bo’ot no todan tebes, tamba ne’e ita tenki servisu makas hodi hatan ba 75% ne’e ho objetivu atu bele promove ita nia inan aman agrikultur sira liu husi produtu lokal ne’ebe mk sira iha.

Enkuantu AMD no WFP kontinua komprometidu atu servisu hamutuk ho parseiru hotu-hotu hodi asegura programa ida ne’e lao ho di’ak no fó impaktu positivu ba komunidade.

      

𝐃í𝐥𝐢 𝟎𝟔 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisípiui (PAM) Díli, Sr. Francisco dos Santos hala’o enkontru ho Terras no Propriedade, SEATOU, ANATL, EP no ADN, IP kona ba diskute preparasaun no mekanizmu implementasaun despeju administrativu ba komunidade afetadu iha Suku Komoro.

Enkontru ne’e realiza hodi haforsa koordinasaun entre instituisaun relevante sira, atu asegura katak prosesu despeju administrativu hala’o tuir lei no prosedimentu ne’ebé vigora, ho konsiderasaun ba direitu no dignidade komunidade afetada.

Diretor Geral Terras no Propriedade, Sr. Lucas António da Costa hateten, komunidade afetadus iha Aeroportu hamutuk uma kain 57 ne’ebe mak halo ona notifikasaun iha loron 19 fulan Juñu ne’ebe kompleta 10 dias hodi hamamuk fatin maibe to agora sira seidauk kopera, tamba ne’e, parte relevante konvoka enkontru refere hodi buka solusaun para bele hasai sira ho obrigatoriu tamba data ne’ebe fo liu ona prazu.

Iha fatin hanesan PAM Díli mos salienta katak molok halo eviksaun ka despezu administrativu tenki hare uluk lai baze legal sira

“ molok ita atu halo asaun ida ne’e ita liu ona husi prosesu lubuk ida hanesan halo notifikasaun no fo mos tempu ba sira durante loron sanulu hodi hamamuk fatin no ikus liu mak ita hetan despasu ba despeju administrativu ne’e, entaun liu husi prosesu sira ne’e hotu ita tenki implementa, governu ka estadu ida ne’e iha rekursu tomak hodi halo jestaun, tanba ne’e bainhira ita tun ba terrenu ita tenki prepara didiak kondisaun hanesan logístika, transporte hodi transporta ita nia komunidade sira sai husi ne’eba” PAM informa

Alende ne’e mos PAM hatutan wanhira ekipa tun dala ida tan ne’e sei la halo negosisaun ho komunidade afetadus sira tamba antes ne’e iha ona notifikasaun.

Entertantu enkontru refere marka prejensa husi Diretor Nasional Terras Propriedade, Diretor Geral Terras Propriedade, Prezidente ANATL ho ekipa, Diretor Geral Obras Públika ho ekipa, Diretora Geral Seatou ho ekipa, no reprejentante Komandante PNTL Munisípiu Díli.

Tuir informasaun ekipa sei kontinua realiza enkontru iha loron sexta semana ne’e hodi kontinua buka solusaun ne’ebe diak atu nune’e bainhira tun ba terrenu hodi halo despezu administrative iha tempu badak nia laran.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)

𝐃𝐢𝐥𝐢, 𝟎𝟔 𝐉𝐮𝐥𝐥𝐮 𝟐𝟎𝟐𝟔

Autoridade Munisípiu Dili (AMD), liu husi Prezidente Autoridade Munisípiu (PAM) Dili, Sr. Francisco dos Santos, partisipa iha enkontru interministerial kona-ba preparasaun vizita Prezidente Dalimak (5.ª) Repúblika Indonézia, Megawati Soekarnoputri mai Timor-Leste.

Enkontru ne’e hala’o iha Ministério dos Negócios Estrangeiros e Cooperação (MNEC), segunda-feira (06/07). Ho objetivu atu koordena preparasaun entre ministériu no instituisaun sira atu garante vizita ne’e la’o ho di’ak. Tuir planu, Megawati Soekarnoputri sei to’o iha Timor-Leste iha loron 8 fulan Jullu no hala’o vizita durante loron tolu, husi loron 8 to’o 10 fulan Jullu 2026.

Iha enkontru ne’e, reprezentante husi ministériu no instituisaun relevante sira aprezenta ida-idak nia preparasaun. PAM Dili mós hato’o preparasaun Autoridade Munisípiu Dili nian, inklui limpeza dalan protokolu no dalan sira ne’ebé konvoi sei liu, no mobilizasaun estudante eskola primária sira atu kaer bandeira Repúblika Demokrátika Timor-Leste no Repúblika Indonézia hodi simu no fó boas-vindas ba delegasaun durante konvoi.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐃𝐢𝐥𝐢, 𝟎𝟔 𝐉𝐮𝐥𝐥𝐮 𝟐𝟎𝟐𝟔

PAM Dili, Sr. Francisco dos Santos, hala’o enkontru ho Diretór Jerál Ministériu Komérsiu no Indústria (MCI), Xefe Gabinete MCI, ekipa konsultór, reprezentante husi Agência Dezenvolvimentu Nasionál, Institutu Públiku (ADN, IP) no ministériu relevante sira seluk, kona-ba aprezentasaun relatóriu final estudu viabilidade ba projetu konstrusaun Sentru Komersial Merkadu Taibesi.

Enkontru ne’e realiza iha Ministériu Komérsiu no Indústria, Segunda-feira (06/07).

Iha aprezentasaun ne’e, ekipa konsultór hatudu rezultadu estudu viabilidade ne’ebé tama ona ba etapa relatóriu final, no husu ministériu relevante sira atu fó avaliasaun, observasaun, rekomendasaun no kontribuisaun téknika hodi hasa’e kualidade relatóriu antes halo aprovasaun final. Prosesu ida ne’e importante atu identifika aspetu sira ne’ebé presiza hadi’a ka ajusta, atu relatóriu final bele sai baze ida ne’ebé forte ba implementasaun projetu.

Liu husi enkontru ne’e, parte sira ne’ebé envolve mós reafirma komitmentu atu kontinua hametin koordinasaun interministeriál no kolaborasaun entre instituisaun relevante sira, hodi asegura projetu konstrusaun Sentru Komersial Merkadu Taibesi bele implementa ho planeamentu ne’ebé diak, efisiente no fó benefísiu ba povu no Estadu.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)