𝐀𝐌𝐃 𝐇𝐀𝐋𝐀’𝐎 𝐋𝐈𝐌𝐏𝐄𝐙𝐀 𝐋𝐎𝐑𝐋𝐎𝐑𝐎𝐍 𝐈𝐇𝐀 𝐒𝐈𝐃𝐀𝐃𝐄 𝐃𝐈𝐋𝐈 𝐇𝐎𝐃𝐈 𝐌𝐀𝐍𝐓É𝐍 𝐃Í𝐋𝐈 𝐌𝐎𝐎𝐒 𝐍𝐎 𝐒𝐀𝐔𝐃Á𝐕𝐄𝐋

𝐀𝐌𝐃 𝐇𝐀𝐋𝐀’𝐎 𝐋𝐈𝐌𝐏𝐄𝐙𝐀 𝐋𝐎𝐑𝐋𝐎𝐑𝐎𝐍 𝐈𝐇𝐀 𝐒𝐈𝐃𝐀𝐃𝐄 𝐃𝐈𝐋𝐈 𝐇𝐎𝐃𝐈 𝐌𝐀𝐍𝐓É𝐍 𝐃Í𝐋𝐈 𝐌𝐎𝐎𝐒 𝐍𝐎 𝐒𝐀𝐔𝐃Á𝐕𝐄𝐋

𝐃í𝐥𝐢, 𝟖 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔

Autoridade Munisípiu Díli (AMD), liu husi Ekipa Esgotu no SMASA, kontinua intensifika atividade limpeza lorloron iha sidade Díli, ho objetivu atu rekolha lixu ne’ebé namkari iha fatin públiku sira.

Atividade limpeza ne’e hala’o nu’udar parte husi esforsu AMD atu asegura Dili nafatin hakmatek, moos no furak

Ekipa sira hala’o servisu limpeza no rekolha lixu iha dalan públiku, bairu sira hanesan Valeta, mota, jardin no fatin seluk ne’ebe lixu sira namkari arbiru.

Ekipa Esgotu no SMASA nafatin kontinua servisu makaas hodi rekolha lixu tamba komunidade barak mak seidauk iha konsiensia hodi kontinua soe lixu iha fatin publiku, valeta no soe lixu arbiru.

Tuir lolos komunidade sira tenke koopera ho AMD hodi soe lixu tuir fatin ka lixeira ne’ebe AMD prepara ona iha kada bairu no fatin publiku atu nunee evita foer sira namkari arbiru ka iha mota no valeta tamba sidade ida nia furak laos deit responsabilidade ema ida nian, maibe responsabilidade ema hotu nian.

AMD kontinua husu komunidade Dili nia konsiensia humana atu koopera hamutuk hodi hamoos sidade Dili.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)

𝐃𝐢𝐥𝐢, 𝟕 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔

Secretáriu Munisipál Administrasaun, Planeamentu, Investimentu no Dezenvolvimentu Integradu Autoridade Munisípiu Dili (AMD), Filomeno Maria da Silva Smith, ne’ebé nu’udar PAM Interinu, hamutuk ho Secretáriu Munisipál na’in rua seluk, Diretór Servisu Munisipál sira no Administrador Postu Administrativu lima, hala’o reuniaun iha Salaun A, AMD, segunda-feira (7/9), hodi diskute preparasaun ba komemorasaun Dili Day 2026, ne’ebé sei realiza iha loron 10 Outubru 2026, nu’udar komemorasaun aniversáriu Dili day ba dala 257.

Reuniaun ne’e objetivu atu hametin koordenasaun entre estrutura administrasaun munisipál, postu administrativu no servisu relevante sira, hodi halo preparasaun tomak no másimu ba komemorasaun Dili Day iha tinan ne’e. Koordenasaun ne’e inklui planeamentu no organizasaun atividade sira, fahe responsabilidade entre parte sira ne’ebé relevante, no asegura katak selebrasaun aniversáriu Dili Day bele hala’o ho di’ak, organizadu, no susesu.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐅𝐔𝐍𝐒𝐈𝐎𝐍Á𝐑𝐈𝐔 𝐀𝐌𝐃 𝐇𝐀𝐋𝐀’𝐎 𝐈𝐍𝐒𝐀𝐑 𝐁𝐀𝐍𝐃𝐄𝐈𝐑𝐀 𝐍𝐀𝐒𝐈𝐎𝐍𝐀𝐋 𝐈𝐇𝐀 𝐈𝐍Í𝐒𝐈𝐔 𝐅𝐔𝐋𝐀𝐍 𝐒𝐄𝐓𝐄𝐌𝐁𝐑𝐔

𝐃í𝐥𝐢, 𝟕 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔

Prezidente Autoridade Munisípiu Dili Interinu, Secretario Municipál Administrasaun Planeamento, Investimento e Dezenvolvimento Integrado da Autoridade Municipio Díli-Filomeno Maria da Silva Smith hamutuk ho Funsionáriu Autoridade Munisípiu Díli (AMD), ohin, hala’o serimónia insar Bandeira Nasional RDTL iha resintu AMD, Díli.

Atividade ne’e hala’o nu’udar parte husi komitmentu institusionál atu promove no hametin espíritu nasionalizmu no patriotizmu entre funsionáriu sira.

Serimónia insar Bandeira Nasional ne’e hala’o iha inísiu kada fulan no ohin lidera husi Secretáriu Munisipál Administrasaun, Planeamentu, Investimentu no Dezenvolvimentu Integradu, ne’ebé nu’udar PAM Interinu, Filomeno Maria da Silva Smith.

Iha nia mensajen, nia hateten katak insar bandeira la’ós de’it serimónia, maibé hanesan símbolu husi respeitu, lealdade no responsabilidade sidadaun sira, liuliu funsionáriu públiku, ba nasaun no povu RDTL.

Nia mós apela ba funsionáriu AMD hotu atu hala’o knaar ho responsabilidade, disiplina no komitmentu forte, hodi kontribui ba dezenvolvimentu nasional, liuhusi servisu públiku ne’ebé di’ak no efetivu ba komunidade iha Munisípiu Díli.

“Nu’udar funsionáriu públiku, ita iha responsabilidade no kompromisu atu sai fiel ba nasaun ida-ne’e, no kontinua fó kontribuisaun liuhusi ita-nia servisu ba dezenvolvimentu no bem-estar komunidade,” dehan Filomeno Maria da Silva Smith.

Serimónia ne’e marka kompromisu AMD atu kontinua hametin valor nasionalizmu, patriotizmu, responsabilidade no servisu públiku, hodi asegura katak funsionáriu sira sai ezemplu diak iha servisu fatin no kontribui ba hadi’a prestasaun servisu.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐏𝐀𝐌 𝐃Í𝐋𝐈 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐕𝐈𝐙𝐈𝐓𝐀 𝐈𝐊𝐔𝐒 𝐔𝐑𝐍𝐀 𝐌𝐎𝐍𝐒𝐄𝐍Ó𝐑 𝐌𝐀𝐑𝐓𝐈𝐍𝐇𝐎 𝐃𝐀 𝐂𝐎𝐒𝐓𝐀 𝐋𝐎𝐏𝐄𝐒 𝐈𝐇𝐀 𝐑𝐄𝐙𝐈𝐃É𝐍𝐒𝐈𝐀 𝐋𝐀𝐇𝐀𝐍𝐄 𝐎𝐂𝐈𝐃𝐄𝐍𝐓𝐀𝐋

𝐃í𝐥𝐢, 𝟓 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔

Prezidente Autoridade Munisípiu (PAM) Díli, Sr. Francisco dos Santos, partisipa iha momentu vizita ikus ba urna Monsenór Martinho da Costa Lopes, iha nia rezidénsia iha Lahane Ocidental, nu’udar parte husi prosesu omenajen no transladasaun restu mortais Monsenór ne’e mai Timor-Leste.

Vizita ne’e sai nu’udar momentu importante no emosional ba família, Igreja, autoridade sira no komunidade, tanba rezidénsia Lahane Ocidental iha valor istóriku no espirituál iha vida Monsenór Martinho da Costa Lopes. Iha fatin ne’e, família no komunidade sira hamutuk fó omenajen ikus, halo orasaun no hato’o respeitu ba figura ne’ebé nia moris tomak dedika ba servisu Igreja no povu Timor-Leste.

Iha atividade ne’e, Prezidente PAM Díli hamutuk ho reprezentante Governu, Igreja, família no komunidade partisipa iha prosesu simu no akompañamentu urna, ne’ebé liu husi rezidénsia Lahane Ocidental antes kontinua ba etapa tuirmai husi programa transladasaun.

Antes ne’e, PAM Díli, Governu, Igreja no família hala’o ona koordenasaun hodi prepara vizita urna Monsenór Martinho, inklui aspetu organizasaun, seguransa, akompañamentu no preparasaun fatin. Rezidénsia ne’e mós konsidera nu’udar fatin istóriku ne’ebé presiza preserva no valoriza nu’udar parte husi memória no patrimóniu istóriku Timor-Leste.

Momentu vizita ikus ne’e la’ós de’it sai hanesan omenajen ba Monsenór Martinho da Costa Lopes, maibé mós sai oportunidade ba komunidade atu relembrá fali nia kontribuisaun, sakrifísiu no servisu pastorál ba Igreja no povu Timor-Leste, liuliu iha períodu difísil iha istória nasaun.

Partisipasaun PAM Díli iha atividade ne’e hatudu kompromisu autoridade munisípiu atu kontinua hametin kooperasaun ho Governu, Igreja, família no komunidade, liuliu iha atividade sira ne’ebé iha valór istóriku, relijiozu no kulturál ba munisípiu no nasaun.

Vizita iha Rezidénsia Lahane Ocidental ne’e sai mós parte husi jornada ikus ba transladasaun restu mortais Monsenór Martinho da Costa Lopes, antes kontinua ba programa sira seluk iha Tasi Tolu no, tuir programa ofisiál, enseramentu transladasaun sei hala’o iha Tasi Tolu no Katedrál Díli iha 10 Setembru 2026.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐏𝐀𝐌 𝐃Í𝐋𝐈 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐀𝐍𝐈𝐕𝐄𝐑𝐒Á𝐑𝐈𝐔 𝟖𝟔.º 𝐄𝐑𝐑𝐄𝐒𝐀𝐔𝐍 𝐊𝐀𝐍Ó𝐍𝐈𝐊𝐀 𝐃𝐈𝐎𝐒𝐄𝐙𝐄 𝐃Í𝐋𝐈 𝐍𝐎 𝐀𝐁𝐄𝐑𝐓𝐔𝐑𝐀 𝐈𝐌𝐀𝐂𝐔𝐋𝐀𝐃𝐀 𝐂𝐔𝐏 𝐒𝐄𝐀𝐒𝐎𝐍 𝟑

𝐃í𝐥𝐢, 𝟒 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔

Prezidente Autoridade Munisípiu (PAM) Díli, Sr. Francisco dos Santos, partisipa iha selebrasaun aniversáriu ba dala 86.º Erresaun Kanónika Dioseze Díli, ne’ebé agora sai Arquidiocese Metropolitana Díli, ne’ebé hala’o hamutuk ho abertura kompetisaun Imaculada Cup Season 3, 2026.

Selebrasaun ne’e sai nu’udar momentu importante ba Igreja no komunidade, tanba la’ós de’it komemora aniversáriu istóriku Dioseze Díli, maibé mós sai oportunidade atu hametin fraternidade, unidade no solidariedade liuhusi envolvimentu komunidade, liuliu jerasaun jovem sira.

Iha ninia intervensaun, PAM Díli hateten katak transformasaun Dioseze Díli ba Arquidiocese Metropolitana Díli marka istória foun ba Igreja no povu Timor-Leste. Nia mós hatudu katak fatin ne’e iha valor istóriku, tanba iha tinan 36 liubá, akontese ona misa boot ida ne’ebé akompaña ho manifestasaun bo’ot husi povu Timor-Oan hodi hato’o ba mundu tomak sira nia aspirasaun atu ukun-an rasik.

Iha oportunidade hanesan ne’e, PAM Díli mós hato’o mensajen ba kik oan sira atu valoriza domin, fraternidade no unidade nu’udar valor importante iha moris loroloron.

“Hau husu ba alin sira, husik ba imi nia inan-aman riku ho osan ka material de’it. Importante liu mak imi tenki riku ho domin, tanba domin mak importante tebtebes,” hateten PAM Díli.

Nia mós apela ba komunidade, liuliu joven no estudante sira, atu evita hahalok ne’ebé bele hamosu konflitu, hanesan tuda malu, hirus malu no baku malu, maski tanba problema ki’ik.

“Hau husu ba ita boot sira atu hadook tiha hahalok aat sira, ne’ebé bele halo ita tuda malu, hirus malu no baku malu. Ohin loron iha eskola mós ita haree alin sira balu gosta baku no tuda malu, maski problema ki’ik de’it,” nia hateten.

PAM Díli subliña katak atividade hanesan Imaculada Cup tenki sai espasu ida atu jovem sira aprende kona-ba amizade, respeitu, disciplina no domin.

“Tanba ne’e, hau espera katak imi sira ne’ebé hamutuk iha kalan ida-ne’e tenki riku ho domin, tanba ohin kalan imi hamutuk iha ne’e ho Kristu nia domin. Bainhira imi sai husi fatin ne’e, tenki lori domin ba eskola no ba komunidade,” nia hato’o.

Enkuantu ne’e, Imaculada Cup Season 3, 2026, sai nu’udar plataforma desportiva ida ne’ebé fó oportunidade ba jovem sira atu dezenvolve talentu, disciplina, espírito ekipa no respeitu ba malu. Kompetisaun ne’e mós bele sai meiu ida atu promove konvivénsia saudável, amizade no unidade entre jovem sira.

Selebrasaun aniversáriu 86.º Erresaun Kanónika Dioseze Díli, ne’ebé agora Arquidiocese Metropolitana Díli, hamutuk ho abertura Imaculada Cup Season 3, sai nu’udar momentu atu komemora istória Igreja, valoriza kontribuisaun Igreja ba sosiedade no hametin liután relasaun fraternidade entre Igreja, autoridade no komunidade.

Liuhusi atividade relijioza no desportiva hanesan ne’e, Igreja no komunidade kontinua hamutuk hodi promove dame, unidade, solidariedade no respeitu, ho fó atensaun espesial ba formasaun moral no dezenvolvimentu jerasaun jovem nu’udar futuru nasaun.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐊𝐎𝐌𝐏𝐀Ñ𝐈𝐀 𝗨𝗔𝗟𝗨 𝗛𝗨𝗦𝗜 𝗡𝗔𝗦𝗔𝗨𝗡 Í𝗡𝗗𝗜𝗔 𝗜𝗡𝗧𝗘𝗥𝗘𝗦𝗘 𝗛𝗢𝗗𝗜 𝗛𝗔𝗟𝗢 𝗜𝗡𝗩𝗘𝗦𝗧𝗜𝗠𝗘𝗡𝗧𝗨 𝗜𝗛𝗔 𝗧𝗜𝗠𝗢𝗥-𝗟𝗘𝗦𝗧𝗘 𝗟𝗜𝗨-𝗟𝗜𝗨 𝗜𝗛𝗔 𝗞𝗔𝗣𝗜𝗧Á𝗟 𝗗𝗜𝗟𝗜

𝐃𝐢𝐥𝐢, 𝟎𝟒 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔

Prezidente Autoridade Munisipiu Dili (AMD), 𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬, hala’o enkontru ho delegasaun husi Índia, ne’ebé akompaña husi Embaixadór Timor-Leste iha Índia, 𝐒𝐫. 𝐂𝐚𝐫𝐥𝐢𝐭𝐨 𝐍𝐮𝐧𝐞𝐬, iha Gabinete PAM Dili, Sesta-feira (04/09).

Enkontru ne’e realiza hodi ko’alia kona-ba interese no oportunidade investimentu husi kompañia sira husi nasaun Índia mai iha Timor-Leste, liuliu iha Munisípiu Dili.

Delegasaun ne’e, kompostu husi kompañia na’in ualu, ne’ebé lidera husi 𝐒𝐫. 𝐀𝐛𝐝𝐮𝐥 𝐊𝐡𝐚𝐝𝐞𝐫, ho objetivu atu haree diretamente oportunidade no potensial investimentu iha Munisípiu Dili.

Iha enkontru ne’e, kompañia sira interesante, atu investe iha vários setór, inklui jestaun lixu, enerjia,infraestrutura, Teknolojia informasaun (IT), bee no saúde.

Hatán ba interese investimentu husi kompañia sira husi Índia, Prezidente AMD, Sr. Francisco dos Santos, hato’o apresiasaun ba vizita no inisiativa ne’e.

PAM Dili konsidera interese ne’e nu’udar oportunidade atu esplora potensiál kooperasaun no investimentu iha futuru, liuliu iha setór sira ne’ebé bele kontribui ba dezenvolvimentu no hadi’a prestasaun servisu iha Munisípiu Dili.

Enkontru ne’e mós sai nu’udar pasu inisiál atu kontinua servisu hamutuk hodi identifika oportunidade kooperasaun entre AMD no kompañia sira ne’ebé interese atu halo investimentu iha Timor-Leste, liuliu iha kapitál Dili.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐏𝐀𝐌 𝐃Í𝐋𝐈 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐈𝐍𝐀𝐔𝐆𝐔𝐑𝐀𝐒𝐀𝐔𝐍 𝐏𝐎𝐍𝐓𝐄 𝐌𝐎𝐍𝐒𝐄Ñ𝐎𝐑 𝐌𝐀𝐑𝐓𝐈𝐍𝐇𝐎 𝐃𝐀 𝐂𝐎𝐒𝐓𝐀 𝐋𝐎𝐏𝐄𝐒 𝐈𝐇𝐀 𝐌𝐀𝐍𝐀𝐓𝐔𝐓𝐔.

𝐌𝐚𝐧𝐚𝐭𝐮𝐭𝐮, 𝟒 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔

Prezidente Autoridade Munisípiu (PAM) Dili, Sr. Francisco dos Santos, partisipa iha serimónia inaugurasaun Ponte Monseñor Martinho da Costa Lopes, iha Munisípiu Manatutu, nu’udar parte husi momentu homenajen ikus ba figura importante ne’e.

Inaugurasaun ponte ne’e la’ós de’it remata ona konstrusaun infraestrutura públika, maibé mós sai hanesan forma ida atu hametin memória no fó omenajen ba Monseñor Martinho da Costa Lopes, ne’ebé konsidera nu’udar figura importante iha istória no luta povu Timor-Leste.

Iha serimónia atribuisaun naran ponte ne’e, PR José Ramos-Horta halo assinatura iha plaka ponte nian, nu’udar parte husi momentu ofisiál ne’ebé marka atribuisaun naran “Ponte 𝗠𝗼𝗻𝘀. 𝗠𝗮𝗿𝘁𝗶𝗻𝗵𝗼 𝗱𝗮 𝗖𝗼𝘀𝘁𝗮 𝗟𝗼𝗽𝗲𝘀”. Husi ponte ne’ebé uluk hanaran “Ponte Manatuto”.

Cerimónia ne’e partisipa husi membru Governu sira, korpo diplomatico, no orgaun soberania, lider Igreja Kathólika husi deoseze tolu Dili, Baucau no Maliana, Autoridades Munisipál, no siguransa husi F-FDTL no PNTL hamutuk ho komunidade sira iha Manatuto.

Entertantu tuir Programa, Urna Mons. Martinho da Costa Lopes husi Postu Laleia sei toba kalan ida iha Igreja Santo António Manatuto, no iha loron 4 Setembru sei fila hikas fali mai Tasi-Tolu, Díli.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)

𝗥𝗘𝗦𝗧𝗨𝗦 𝗠𝗢𝗥𝗧𝗔𝗜𝗦 𝗣𝗥𝗘𝗟𝗔𝗗𝗨𝗦 𝗡𝗔𝗜𝗡 𝗧𝗢𝗟𝗨 𝗧𝗢’𝗢 𝗢𝗡𝗔 𝗜𝗛𝗔 𝗧𝗜𝗠𝗢𝗥-𝗟𝗘𝗦𝗧𝗘

𝘿𝙞𝙡𝙞, 𝟬𝟭 𝙎𝙚𝙩𝙚𝙢𝙗𝙧𝙪 𝟮𝟬𝟮𝟲

Restus mortais Preladus nain tolu to’o ona iha Timor-Leste no simu ho formatura parada Militar no Onra Estadu iha Aeroportu Internasionál Presidente Nicolau Lobato, Díli, antes lori ba Tasi-Tolu hodi kontinua hala’o missa agradesimentu.

Preladus nain-3 ne’ebé to’o mak:

1. Saudozu Mons. 𝗠𝗮𝗿𝘁𝗶𝗻𝗵𝗼 𝗱𝗮 𝗖𝗼𝘀𝘁𝗮 𝗟𝗼𝗽𝗲𝘀, Administrador Apostóliku Díli (1978-1983)

2. Saudozu Dom 𝐉𝐚𝐢𝐦𝐞 𝐆𝐚𝐫𝐜𝐢𝐚 𝐆𝐨𝐮𝐥𝐚𝐫𝐭, Bispu Díli (1941-1945)

3. Saudozu Dom 𝐉𝐨𝐬é 𝐉𝐨𝐚𝐪𝐮𝐢𝐦 𝐑𝐢𝐛𝐞𝐢𝐫𝐨, Bispu Díli (1965-1967).

Iha Salaun VIP Aeroportu Comoro, hala’o mós serimónia entrega urnas no assinatura Termo Entrega husi Governu ba parte Igreja.

Hafoin serimónia simu iha Aeroportu Comoro, sarani rihun resin hamutuk ho membru Governu, autoridade Igreja no entidade importante sira halo prosesau la’o ain no reza kanta husi Aeroportu to’o Praça Tasi-Tolu hodi partisipa iha Misa Agradesimentu ba Preladus Nain-4.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐄𝐍𝐊𝐎𝐍𝐓𝐑𝐔 𝐈𝐊𝐔𝐒 𝐄𝐍𝐓𝐑𝐄 𝐊.𝐎. 𝐆𝐎𝐕𝐄𝐑𝐍𝐔 𝐍𝐎 𝐈𝐆𝐑𝐄𝐉𝐀 𝐇𝐎𝐃𝐈 𝐇𝐀𝐋𝐎 𝐏𝐑𝐄𝐏𝐀𝐑𝐀𝐒𝐀𝐔𝐍 𝐒𝐈𝐌𝐔 𝐏𝐑𝐄𝐋𝐀𝐃𝐔𝐒 𝐍𝐀𝐈𝐍 𝟒 𝐈𝐇𝐀 𝐓𝐀𝐒𝐈 𝐓𝐎𝐋𝐔.

𝐃í𝐥𝐢, 𝟑𝟏 𝐀𝐠𝐨𝐬𝐭𝐮 𝟐𝟎𝟐𝟔

Prezidente Autoridade Munisípiu (PAM) Díli, Sr. Francisco dos Santos, hamutuk ho Komisaun Organizadora Governu no Igreja Katólika hala’o observasaun ikus ba fatin Tasi-Tolu hodi haree diretamente preparasaun ba serimónia simu Restos Mortais Preladus Nain-4.

Objetivu husi observasaun ne’e, atu garante katak, seguransa, protokolu, no fatin ba selebrasaun Misa iha Tasi-Tolu prontu ona.

Tuir planu, Misa Agradesimentu iha Tasi-Tolu sei prezide husi autoridade másimu Igreja nian no sei partisipa husi membru Governu, korpu diplomátiku, autoridade lokál no sarani sira husi munisípiu hotu.

Komisaun Organizadora apela ba komunidade atu partisipa ho dame no disiplina hodi fó onra ikus ba Preladus sira ne’ebé kontribui boot ba luta ba Independénsia no dame iha Timor-Leste. No serimónia omenajen ne’e mos hodi rekoñese sira-nia legadu fiar, servisu no dedikasaun ba Povu Timor-Leste.

Observasaun ne’e lidera husi Sua Eselénsia Ministru Administrasaun Estatál, S.E. Tomás do Rosário Cabral, hamutuk ho reprezentante husi Governu, Igreja, F-FDTL, PNTL no ekipa tékniku sira.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐌𝐚𝐧𝐚𝐭𝐮𝐭𝐮, 𝟑𝟎 𝐀𝐠𝐨𝐬𝐭𝐮 𝟐𝟎𝟐𝟔

Prezidente Autoridade Munisípiu (PAM) Díli, Sr. Francisco dos Santos, partisipa iha Serimónia Komemorasaun loron konsulta Popular ba dala 27, ho tema “LORI ESPERANSA BA MUNDU”, ne’ebé realiza iha Munisípiu Manatutu.

Entertantu atividade Komemorasaun loron konsulta Popular ba dala 27 ne’e mos, iha marsa Saudável ne’ebe hahu husi Ponte Manatutu to’o iha fatin serimónia Obrato.

Marsa Saudável ne’e iha objetivu atu promove estilu moris saudável, atividade fizika no konsiensializasaun públika kona-ba importánsia saúde, liuliu liuhosi partisipasaun direta hosi komunidade iha atividade desportiva no rekreativa.

Loron Konsulta Popular ne’ebé hala’o iha 30 Agostu 1999 sai nu’udar momentu istóriku, ne’ebé importante ba povu Timor-Leste, tanba rezultadu hosi prosesu ne’e lori ba faze importante ida iha luta povu Timor-Leste ba autodeterminasaun no restaurasaun independénsia.

Atividade ne’e remata ho atribuisaun prémiu ba manán nain liu husi door prize.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)