𝐏𝐀𝐌 𝐃Í𝐋𝐈 𝐏𝐀𝐑𝐓𝐈𝐒𝐈𝐏𝐀 𝐕𝐈𝐙𝐈𝐓𝐀 𝐃𝐄𝐋𝐄𝐆𝐀𝐒𝐀𝐔𝐍 𝐏𝐀𝐑𝐋𝐀𝐌𝐄𝐍𝐓𝐔 𝐀𝐔𝐒𝐓𝐑Á𝐋𝐈𝐀 𝐁𝐀 𝐏𝐑𝐎𝐉𝐄𝐓𝐔 𝐁𝐄𝐄 𝐌Ó𝐒 𝐈𝐇𝐀 𝐒𝐔𝐊𝐔 𝐃𝐀𝐑𝐄

𝐃í𝐥𝐢, 𝟐𝟕 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisípiu Dili (PAM Dili), Sr. Francisco dos Santos, partisipa hamutuk ho Delegasaun Parlamentu Austrália iha vizita ba Projetu Bee Moos iha aldeia Sukalau & Fatunaba, Suku Dare, Postu Administrativu Vera Cruz, Munisípiu Díli, Segunda (27/07).

Objetivu husi vizita ne’e, atu haree diretamente progresu projetu infraestrutura komunitária no bee moos através programa PNDS ho kooperasaun dezenvolvimentu ne’ebé Austrália apoia liuhusi programa PARTISIPA.

Delegasaun ne’e vizita projetu bee moos no dalan ne’ebé implementa tuir abordajen dezenvolvimentu orientadu ba komunidade. Durante vizita, sira hasoru Xefe Suku, Xefe Aldeia, estrutura PNDS no benefisiáriu sira iha Suku Dare hodi rona diretamente sobre esperiénsia no benefísiu husi implementasaun projetu refere.

Iha oportunidade ne’e, delegasaun no PAM Dili observa rezervatóriu bee no torneira públika ne’ebé fornese bee mós ba komunidade hanesan rezultadu husi kooperasaun entre Governu Timor-Leste no Governu Austrália.

Hafoin vizita ba kampu, delegasaun kontinua ba Dare Café no Museu hodi hala’o diskusaun kona-ba apoiu programa PARTISIPA iha área bee moos, infraestrutura komunitária, no parseria atu hametin sistema servisu públiku ho Ministériu Obras, inklui fortalese kapasidade governasaun no dezenvolvimentu iha nível munisípiu.

Partisipasaun PAM Dili iha vizita ne’e, atu akompaña delegasaun no hatudu kompromisu instituisaun atu kontinua hametin koordenasaun ho parseiru dezenvolvimentu sira hodi kontinua apoiu obras infraestrutura bázika, hadia asesu bee moos ba komunidade, no suporta dezenvolvimentu sustentável iha Munisípiu Díli.

Iha PAM nia intervensaun hatete, hanesan Autoridade Munisipiu Díli, hato’o agradesimentu ba delegasaun Parlamentu Austrália, no sujere delegasaun Parlamentu Austrália atu hato’o ba Governu Australia hodi kontinua oferese apoiu dezenvolvimentu no tékniku hodi haree fila-fali ba istória naruk no amizade ne’ebé forti entre Timor-Leste ho Australia hanesan nasaun viziñu.

Enkuantu orsamentu ne’ebé aloka ba Projetu Bee Moos iha aldeia Sucalau totál hamutuk $ USD 23,517.84 no iha Aldeia Fatunaba totál hamutuk $ USD 18,446.82.

       

𝐃í𝐥𝐢, 𝟐𝟕 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisípiu (PAM ) Dili, Sr. Francisco dos Santos, simu ekipa konsultór nasionál husi Partnerships in Environmental Management for the Seas of East Asia (PEMSEA) iha Gabinete PAM Dili.

iha sorumutu ne’e ekipa konsultór Nasional aprezenta konseitu inisiál ba projetu pilotu jestaun lixu mariña no resiklajen iha Timor-Leste ba PAM Dili, no tuir ekipa katak Projetu ne’e hetan apoiu husi Governu Koreia no planeia atu implementa iha Munisípiu Díli, Likisá, Manatutu no Atauro.

Antes prepara konseitu projetu ne’e, ekipa konsultór halo ona konsultasaun ho munisípiu sira seluk no vizita ba Sentru Destinu Final mak Lixu iha Tibar atu avalia kondisaun jestaun lixu no identifika nesesidade sira iha área refere.

Iha aprezentasaun, ekipa konsultór esplika katak projetu ne’e propoin estabelese Material Recovery Facility (MRF) atu halo segregasaun lixu tuir nia tipu, hanesan plástiku, vidru no materiál seluk antes lori ba prosesu resiklajen no materiál sira ne’ebé bele reutiliza sei transforma filafali ba produtu foun ho valór ekonómiku.

Konseitu projetu ne’e, sei kontinua dezenvolve no halo konsultasaun nasionál iha fulan Setembru ka Outubru antes aprezenta ba Governu Koreia iha fulan Dezembru atu hetan aprovasaun. No karik aprovadu, implementasaun sei hahú iha tinan 2027–2028, no ba Munisípiu Díli planeia atu implementa iha Praia dos Coqueiros (Pantai Kelapa).

Iha PAM Dili nian intervensaun, agradese ba PEMSEA no ekipa konsultór ba inisiativa atu apoiu Timor-Leste, liuliu Munisípiu Díli, hodi dezenvolve sistema jestaun lixu ne’ebé modernu no sustentável.

Nia hatutan katak problema boot ne’ebé Munisípiu Díli hasoru agora mak lixu ne’ebé rekolla lori ba fatin destinu finál de’it tanba seidauk iha sistema resiklajen ne’ebé efetivu. Tanba ne’e, implementasaun sistema resiklajen sei sai baze importante atu apoia polítika segregasaun lixu, hamenus impaktu ambientál no aumenta valór ekonómiku husi materiál sira ne’ebé bele reutiliza.

PAM Dili mós salienta katak munisípiu presiza ekipamentu no mákina resiklajen, liuliu mákina atu harahun no kompaktor lixu, atu hasa’e kapasidade prosesamentu.

PAM apresia ba inisiativa husi PEMSEA hodi bele servisu hamutuk iha futuru no agradese mós parseiru relevante sira hodi realiza projetu ne’e, ho esperansa bele hadi’a jestaun lixu no prezerva ambientál iha Munisípiu Díli no Timor-Leste.

 

𝐓𝐢𝐛𝐚𝐫, 𝐋𝐢𝐪𝐮𝐢𝐜𝐚 𝟐𝟕 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisípiu (PAM) Dili, Sr. Francisco dos Santos, partisipa iha enkontru kooperasaun dezenvolvimentu produtu pellet bambu ne’ebé organiza husi Instituto de Pesquisa, Desenvolvimento, Formação no Promoção do Bambu, I.P. (Instituto Bambu Timor-Leste, I.P.) iha Tibar, Munisípiu Liquiçá.

Iha enkontru ne’e, ko’alia kona-ba oportunidade investimentu no dezenvolvimentu indústria pellet bambu iha Timor-Leste, liu husi kooperasaun entre Instituto Bambu Timor-Leste, I.P. ho investidór estratéjiku husi Pellet Verdi Timor Unip. Lda.

Inisiativa ida ne’e hakarak promove plantasaun bambu, prosesamentu produtu derivadu, no hamosu merkadu sustentável ba konsumasaun doméstiku no esportasaun.

Produtu pellet bambu ne’e konsidera nu’udar alternativa ida ba ai-sunu tradisionál, charcoal no fonte enerjia seluk, ne’ebé bele kontribui ba ekonomia verde, reduza emisaun karbonu no protege ambiente.

Iha ninia intervensaun, PAM Dili hatete katak enkontru ida ne’e importante tebes, liuliu kona-ba garantia produsaun pellet atu bele responde ba nesesidade merkadu, espesialmente iha Munisípiu Dili hanesan kapitál nasaun.

“Ha’u hanoin enkontru ohin ne’e importante tebes, liuliu kona-ba dezenvolvimentu pellet bambu. Bainhira produsaun iha ona no estok garante, ami bele haree oportunidade atu uza iha programa merenda eskolár. Merenda eskolár presiza ai-sunu barak, no pellet bele sai alternativa ida ne’ebé di’ak liu kompara ho ai-sunu tradisionál,” hatete PAM Dili.

Nia mós akresenta katak, se produsaun pellet kontinua no estok iha sufisiente, PAM Dili bele koordena ho Gabinete Apoiu Tékniku no entidade relevante sira atu estuda posibilidade implementasaun pellet iha programa merenda eskolár no promosaun ba utilizasaun iha restorante sira.

“Importante liu mak garantia produsaun no estok. Depois ne’e, ita bele halo sensibilizasaun ba restorante sira kona-ba benefísiu uza pellet, ne’ebé bele redús dependénsia ba gas no ai-sunu, no mós kontribui ba preservasaun ambiente,” akresenta tan PAM Dili.

Iha fatin hanesan Diretor Ezekutivu Instituto Bambu Timor-Leste, I.P. Dr. Abilio I. Almeida Barros esplika, projetu ne’e iha objetivu atu dezenvolve plantasaun bambu, kria oportunidade servisu ba komunidade lokal, hadi’a kapasidade rekursu umanu no apoia polítika ekonomia verde iha Timor-Leste.

Enkontru ne’e lidera husi Diretór Ezekutivu Instituto Bambu Timor-Leste, I.P., no partisipasaun husi entidade relevante sira, inklui Autoridade Munisípiu Dili, Ministériu Edukasaun, Prezidente Autoridade Lisensa Ambiental, (ANLA), reprezentante serve., I.P, no reprezentante Diretor Jeral Meiu Ambiente.

𝐃𝐢𝐥𝐢, 𝟐𝟒 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisípiu (PAM) Dili, Sr. Francisco dos Santos, partisipa iha reuniaun koordenasaun ho Autoridade Nasional Lisensiamentu Ambientál, Instituto Públiku (ANLA, I.P.), Administração de Aeroportos e Navegação Aérea de Timor-Leste, Empresa Pública (ANATL, E.P.), Autoridade Marítima Nasionál (AMN) no entidade relevante sira kona- ba Projetu Dezenvolvimentu no Expansaun Aeroportu Internasional Prezidente Nicolau Lobato (AIPNL), iha Sala Reuniaun ANATL, E.P., Compound Coby House Aeroportu.

Objetivu husi reuniaun ne’e, halo koordenasaun entre instituisaun relevante sira, tanba obra Expansaun Aeroportu Internasional Prezidente Nicolau Lobato tama ona ba faze ezekusaun.

Iha reuniaun ne’e PAM Dili hatete, Autoridade Munisípiu Dili prontu atu koopera hamutuk ho Ekipa Jestaun Projetu AIPNL, ANLA, I.P., ANATL, E.P., no entidade relevante sira, liuliu atu fó apoiu iha prosesu hasai komunidade afetadu sira ne’ebé hela iha área planu projetu Expansaun Aeroportu.

Partisipasaun PAM Dili iha reuniaun ida ne’e atu reforsa kompromisu instituisaun nian hodi haforsa koordenasaun interinstitusionál hodi suporta implementasaun projetu.

Fontes: (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐃𝐢𝐥𝐢, 𝟐𝟒 𝐉𝐮𝐥𝐥𝐮 𝟐𝟎𝟐𝟔

Autoridade Munisípiu Dili fó hatene ba proprietáriu loja, kompañia, Hotel no estabelesimentu komersiál hotu-hotu atu kumpre obrigasaun limpeza diária iha área negósiu. Kualkér violasaun sei sujeitu ba koima administrativa tuir Dekretu-Lei n.º 3/2024 ho montante husi US$ 5. To’o US$ 500 ba entidade individuál no US$ 10 to’o US$ 1.000 ba entidade koletiva, depende ba tipu no gravidade violasaun.

Favor lee sirkulár kompletu iha imajen tuir mai.

“MAI ITA HAMURAK DILI “HAKMATEK, MOS NO FURAK”

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)

𝐃í𝐥𝐢, 𝟐𝟑 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisípiu (PAM) Dili, Sr. Francisco dos Santos, hala’o vizita traballu ba Postu Administrativu Metinaru ho objetivu atu haree diretamente kondisaun servisu, monitoriza implementasaun programa governu sira, no hasoru malu ho lideransa lokal hodi rona aspirasaun no nesesidade komunidade.

Iha vizita ne’e, Prezidente halo enkontru ho Administradór Postu, xefe suku sira, no reprezentante komunidade, atu diskute kona-ba dezenvolvimentu iha área infraestrutura, ambiente, limpeza, servisu públiku, no prioridade sira atu hadi’a moris povu.

Iha PAM ninia intervensaun hateten, soru-mutu ohin ne’e hanesan servisu Autoridade nian atu hakbesik an ba komunidade sira hodi bele rona direta husi nai suku sira kona-ba dezafiu saida mak sira infrenta lor-loron, liu-liu progresu no projetu PNDS, PDIM, AGRIKULTURA no mos iha DEZASTRE NATURAIS nian hodi bele informa lalais atu nune’e bele buka lalais solusaun hodi rejolve. Nia mos husu ba autoridade lokal sira liu-liu kona-ba planu dezenvolvimentu komunitária (PDK), tamba planu ida ne’e inportante tebes atu hodi dezenvolve fali sai planu dezenvolvimentu integradu Munisípal, husi ida ne’e mak hodi sai ba planu governu nian.

Alende ne’e, PAM mos fó orientasaun ba APA, Sefe Suku no Sefe Aldeia, sira atu kontinua hametin koordinasaun, aumenta responsabilidade iha prestasaun servisu públiku, liu liu deskuti kona-ba prioridade iha suku sira, labele tau programa rua ka tolu dala ida maibe tenki prioritiza uluk ida ne’ebe prioridade tebes ba komunidade sira no garante katak programa governu sira bele implementa ho di’ak, transparente no efetivu.

Vizita traballu ne’e refleta komitmentu Autoridade Munisípíu Dili atu besik liu povu. hametin governasaun lokal, no asegura dezenvolvimentu neʼebé inkluzivu no sustentável ba komunidade hotu iha Munisípiu Dili.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)

𝐃𝐈𝐋𝐈, 𝟐𝟑 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisípiu (PAM) Díli, Sr. Francisco dos Santos, partisipa iha abertura Formasaun Téknika Integrada ba Enjeñeiru Munisipál, Rejiaun Administrativa Espesiál Oecusse Ambeno (RAEOA) no Ataúro, ne’ebé realiza durante loron rua, 23 to’o 24 Jullu 2026, iha Salaun Delta Nova, hodi envolve enjiñeiru hamutuk 56 kompostu husi tékniku Programa Dezenvolvimentu Integradu Munisipal (PDIM) na’in-28 no tékniku PNDS na’in-28, ho oradór na’in-6 husi asesór no tékniku sénior ADN nian.

Iha abertura ne’e, Primeiru-Ministru (PM) 𝐊𝐚𝐲 𝐑𝐚𝐥𝐚 𝐗𝐚𝐧𝐚𝐧𝐚 𝐆𝐮𝐬𝐦𝐚̃𝐨 apela ba enjeñeiru munisipál sira atu aproveita formasaun ne’e hodi hametin kapasidade profisionál, no prepara an ba governasaun lokál ne’ebé forte, efisiente, no responsivu ba nesesidade povu nian.

Aleinde ne’e Ministru Planeamentu no Investimentu Estratéjiku, 𝐆𝐚𝐬𝐭𝐚̃𝐨 𝐅𝐫𝐚𝐧𝐜𝐢𝐬𝐜𝐨 𝐝𝐞 𝐒𝐨𝐮𝐬𝐚, hateten katak formasaun ne’e importante atu reforsa kapasidade rekursu umanu iha setor infraestruturas no garante katak projetu dezenvolvimentu implementa tuir padraun tékniku ne’ebé di’ak.

Iha oportunidade ne’e, Diretór Ezekutivu Ajensia Dezenvolvimentu Nasional (ADN), 𝐉𝐚𝐧𝐮𝐚́𝐫𝐢𝐨 𝐌𝐚𝐢𝐚 𝐆𝐮𝐭𝐞𝐫𝐫𝐞𝐬, esplika katak treinamentu ne’e destina ba tékniku Programa Dezenvolvimentu Integradu Munisipál (PDIM) no Programa Nasionál Dezenvolvimentu Suku (PNDS), hodi hasa’e kapasidade téknika atu asegura projetu infrastrutura la’o ho kualidade, responsabilidade, no fó benefísiu sustentável ba komunidade.

Formasaun ne’e ho tema “Kapasitasaun Jestaun Siklu Projetu Eskala Ki’ik Bazeia ba Padraun no Prosedimentu Tékniku ADN, I.P.”, ho objetivu atu hasa’e kapasidade tékniku munisipál sira iha área planeamentu, implementasaun, monitorizasaun, no kontrolu kualidade projetu infraestrutura, hodi prepara rekursu umanu ba implementasaun polítika desentralizasaun podér lokál.

Treinamentu ne’e envolve partisipante na’in-56 kompostu husi tékniku Programa Dezenvolvimentu Integradu Munisipal (PDIM) na’in-28 no tékniku PNDS na’in-28, ho oradór na’in-6 husi asesór no tékniku sénior ADN nian.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)

𝐃𝐢𝐥𝐢, 𝟐𝟑 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisípiu ( PAM), Dili Sr. Francisco dos Santos, simu ekipa husi Autoridade Protesaun Sivil (APC) iha Gabinete PAM Dili hodi hala’o enkontru koordenasaun kona-ba preparasaun hasoru impaktu fenomena El Niño ne’ebé previstu sei afeta Timor -Leste liu-liu iha Munisipiu Dili

Iha enkontru ne’e, parte husi APC hateten katak vizita ne’e ninia objetivu mak atu husu orientasaun husi PAM Dili kona-ba oinsá ezekuta medida preventivu iha terrenu. Parte APC hatutan katak Timor-Leste daudaun prepara-an atu hasoru El Niño, tanba ne’e presiza hametin koordenasaun entre instituisaun sira atu bele responde lalais ba risku sira ne’ebé bele mosu iha Munisípiu Dili.

Prezidente PAM Dili apresia inisiativa APC no reafirma katak Autoridade Munisípiu Dili sei kontinua servisu hamutuk ho entidade relevante hotu atu prepara medida preventiva. Nia mos husu komunidade atu aumenta kuidadu durante tempu bailoron, liuliu hodi evita sunu rai iha foho no fatin aas sira ne’ebé bele hamosu ahi-lakan.

“Autoridade Munisípiu Dili sei servisu hamutuk ho entidade hotu atu prepara medida preventiva hasoru El Niño. Maski rekursu seidauk sufisiente, ita sei kontinua hametin koordenasaun no apoiu malu atu responde ba situasaun emerjénsia sira.” — PAM esplika.

PAM mos informa katak, maski rekursu no ekipamentu seidauk sufisiente, iha planu atu aumenta kapasidade liuhusi ekipamentu no viatura mini bombeiru foun ne’ebé sei apoiu operasaun iha futuru besik.

Enkontru ne’e remata ho komprimisu hamutuk entre APC no PAM Dili atu kontinua koordenasaun no tuir orientasaun ne’ebé fó ona, hodi garante preparasaun no resposta ne’ebé efetivu ba risku El Niño iha Munisípiu Dili.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)