PAM DILI KONVIDA MEMBRU CCM HODI PARTISIPA IHA ENKONTRU IMPORTANTE IHA SALAUN AMD

𝐃𝐢𝐥𝐢, 𝟏𝟑 𝐌𝐚𝐢𝐨 𝟐𝟎𝟐𝟔

Prezidente Autoridade Munisipál Dili, Sr. Francisco dos Santos, konvida membru sira husi Conselho Coordenasaun Munisipál (CCM) hodi partisipa iha enkontru importante ida ne’ebé realiza iha Salaun Enkontru “B” Autoridade Munisipál Dili, iha quarta-feira ne’e.

Enkontru refere realiza bazeia ba Dekretu Lei Nº 84/2023, loron 23 Outubru, liu-liu iha artigu 38 kona-ba Conselho Coordenasaun Munisipál, ho objetivu atu fortalese koordenasaun no planeamentu dezenvolvimentu iha Munisipiu Dili.

Iha reuniaun ne’e, asuntu prinsipál tolu mak diskute hamutuk, mak hanesan Planu Investimentu Munisipál, preparasaun selebrasaun Loron Restaurasaun Independénsia 20 de Maiu, no atualizasaun kona-ba situasaun jerál iha Munisipiu Dili.

Prezidente AMD husu ba membru CCM sira atu marka prezensa no partisipa ativamente hodi kontribui ideia no rekomendasaun sira ba dezenvolvimentu Munisipiu Dili ne’ebé diak. “ ita presiza servisu hamutuk ho objetivu ida deit, atu hadi’a Munisípiu Dili no fó servisu ne’ebé diak liu ba komunidade. Bainhira ita servisu ho espíritu ekipa, koordenasaun no responsabilidade hamutuk, rezultadu sira sei diak no bele sente diretamente husi povu,” hatete Prezidente PAM Dili.

Enkuantu iha enkontru ne’e hetan partisipasaun masimu husi SECAM nain 3, Diretor/a servisu munisipais, APA nain 5 no autoridade Lokal sira husi Munisipiu Dili no konvidadus sira seluk.

Fontes : (𝐌𝐞𝐝𝐢𝐚 𝐆𝐚𝐛. 𝐏𝐀𝐌)