𝐃𝐢𝐥𝐢, 𝟎𝟖 𝐉𝐮ñ𝐮 𝟐𝟎𝟐𝟔

Servisu Munisipál Ajénsia Fiskalizasaun hala’o konfirmasaun kona-ba implementasaun Programa PME iha Munisípiu Dili, liuhusi enkontru ho Xefe Departamentu Jestaun Programa Edukasaun, Sr. António F. Ximenes, atu diskute progresu no kontinuidade implementasaun programa refere.

Atividade ne’e realiza nu’udar parte husi mekanizmu monitorizasaun no fiskalizasaun hodi asegura katak implementasaun programa lao tuir planu no objetivu ne’ebé estabelese ona.

Iha enkontru refere, parte rua halo troka informasaun kona-ba dezenvolvimentu programa durante períodu implementasaun nian no identifika medida sira atu garante programa bele kontinua ho efetividade.

Objetivu husi konfirmasaun ne’e maka atu hatene progresu implementasaun PME iha terenu, nune’e Ajénsia Fiskalizasaun bele halo avaliasaun no asegura katak atividade sira ne’ebé planeadu kontinua lao tuir planu no rezultadu ne’ebé hakarak atinji.

Husi rezultadu konfirmasaun ne’ebé realiza, Ajénsia Fiskalizasaun konklui katak implementasaun Programa PME durante períodu dahuluk lao ho di’ak no hatudu progresu positivu tuir planu implementasaun ne’ebé define tiha ona.

Servisu Munisipál Ajénsia Fiskalizasaun sei kontinua halo akompañamentu no monitorizasaun ba programa sira iha Munisípiu Dili hodi garante transparénsia, efisiénsia no sustentabilidade implementasaun programa governu nian.