SMASA HAMUTUK HO EKIPA HAMOS ESGOTU NO LIMPEZA MOTA LARAN, KONTINUA INTENSIFIKA ATIVIDADE LIMPEZA LOR-LORON IHA SIDADE DILI

𝐃í𝐥𝐢, 𝟐𝟗 𝐀𝐛𝐫𝐢𝐥 𝟐𝟎𝟐𝟔

Servisu Munisipal Água, Saneamentu no Ambiental (SMASA), hamutuk ho ekipa hamos esgotu no limpeza mota laran, kontinua intensifika atividade limpeza lor-loron iha sidade Dili. Aksaun ida ne’e inklui hasai lixu sira ne’ebé intupidu hela iha valeta no foer sira neʼebé naklekar iha mota laran, ne’ebé durante ne’e sai hanesan fator prinsipal ba blokiu be’e.

Servisu diáriu ne’e hala’o ho objetivu atu prevene no reduz risku inundasaun, liu-liu iha tempu udan ne’ebé dala barak hamosu problema boot ba komunidade. Ho limpeza neʼebé regular no organizadu, SMASA no ekipa hamoos esgotu buka nafatim atu asegura katak fluxo be’e lao ho diak no la iha impedimentu iha kanal no valeta sira.

Aleinde ne’e, ekipa SMASA fó atensaun espesial ba bairu-bairu sira ne’ebé fasil hetan inundasaun. Esforsu ida ne’e importante tebes atu mantein sidade Dili nafatin mos, limpa no saudável ba sidadaun hotu.

Autoridade Munisípiu Díli liu husi Servisu Munisipal Água, saneamentu no Ambiental (SMASA), no ekipa hamos esgotu no mota laran nafatin husu konsiensia komunidade hotu iha Dili laran atu soe lixu tuir fatin neʼebé prepara ona iha bairu ida-idak.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)