Diretor Servisu Munisipal (SM) Agrikultura Autoridade Munisípiu Díli, Marcelino Mendonsa Pereira ne’ebé reprezenta Prezidente Autoridade Munisípiu Díli (PAM) iha workshop aprezentasaun rezultadu peskiza preliminária kona-ba análize integradu atu hadi’a sistema ai-han iha Timor-Leste, ne’ebé hala’o iha UN Office, Kaikoli, Díli, tersa-feira (23/06).

Workshop ne’e organiza husi Conselho Nasional Seguransa Ai-han no Soberania no Nutrisaun Timor-Leste (CNSSAN-TL) liu husi parseria ho Universidade Wollongong no WorldFish, ne’ebé implementa projetu iha Munisípiu Díli, Lautém no Oé-Cusse.

Objetivu husi workshop mak atu aprezenta no diskute rezultadu peskiza sistema ai-han, partikularmente iha Pathway 2, ne’ebé foka ba aprezentasaun rezultadu peskiza no opsaun polítika relevante sira hodi identifika oportunidade no prioridade programa servisu ne’ebé bele implementa liu husi koordenasaun interministeriál. Workshop ne’e mós buka hametin kapasidade no estratéjia parte interesada sira atu apoia implementasaun sistema ai-han ne’ebé saudavel, reziliente no sustentavel.

Aleinde ne’e, atividade refere aprezenta mós rezultadu Pathway 3, ne’ebé analiza kona-ba ambiente ai-han saudavel no la saudavel, inklui pontu asesu ai-han iha komunidade no dezenvolvimentu sistema monitorizasaun atu avalia ambiente ai-han ho di’ak liu iha futuru.

Peskiza ne’e hala’o durante tinan 2025, ho ekipa peskiza sira ne’ebé rekolla dadus kona-ba ambiente ai-han no polítika sistema ai-han iha Munisípiu Díli. Estudu ne’e foka liu ba Postu Administrativu Cristo Rei no Metinaro, inklui Suku Bidau Santa Ana, Hera no Wenunuk.

Partisipa iha workshop refere mak Diretor Ezekutivu CNSSAN-TL, reprezentante ACIAR, Diretor Jeral Seguransa Alimentar husi MAPPF, Diretora Servisu Munisipal Seguransa Alimentar, Diretor Servisu Munisipal Jestaun Risku no Desastre Naturais, reprezentante liña ministerial sira, parseiru dezenvolvimentu, reprezentante Administrasaun Postu Kristu Rei no Metinaro, asesór sira, no parte interesada relevante sira.

Liuhusi atividade ida-ne’e, instituisaun governamentál no parseiru dezenvolvimentu sira hametin tan koordenasaun no kolaborasaun atu utiliza rezultadu peskiza hanesan baze ba formula polítika no programa sira ne’ebé bele kontribui ba hadi’ak seguransa ai-han, nutrisaun no sustentabilidade sistema ai-han iha Timor-Leste.