𝐃í𝐥𝐢, 𝟐𝟒 𝐉𝐮ñ𝐮 𝟐𝟎𝟐𝟔

Servisu ekipa esgotu Autoridade Munisípiu Díli (AMD), kontinua hala’o atividade limpeza regulár iha drenájen no mota sira iha área Munisípiu Díli. Atividade ne’e realiza kada loron hodi asegura bee dalan sira nafatin moos no kria ambiente ne’ebé moos no saudavel ba komunidade munísipiu Dili.

Objetivu husi limpeza regulár ne’e, atu prevene inundasaun durante tempu udan, hamenus risku moras ne’ebé mai husi ambiente ne’ebé fo’er, no mantéin beleza sidade Díli nian. Além de ne’e, atividade refere importante atu proteje infraestrutura drenájen sira atu bele funsiona ho di’ak no sustentável.

Limpeza ne’e kobre área Díli laran tomak, liuliu iha fatin drenájen sira, no mota sira ne’ebé presiza manutensaun regulár. Ho servisu ne’e, AMD reafirma nia komitmentu atu fó servisu públiku ne’ebé di’ak ba komunidade no kria ambiente ne’ebé saudável, limpa no seguru ba ema hotu.

AMD mós apela ba komunidade atu hamutuk kuida ambiente liuhusi konsiensia humana nian hodi labele soe fo’er arbiru iha drenájen no mota sira, maibe tau iha fatin lixu ne’ebé governu liu husi AMD prepara ona iha kada bairu sira, tanba responsabilidade atu mantein sidade limpa la’ós de’it governu nian, maibé responsabilidade hamutuk entre governu no komunidade.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)