PAM DILI HUSU BA PESSOAL SANEAMENTU SIRA ATU HATUDU PRESTASAUN SERVISU
𝐃í𝐥𝐢, 𝟎7 𝐀𝐛𝐫𝐢𝐥 𝟐𝟎𝟐𝟔
Prezidente Autoridade Munisípiu Dili, Sr. Francisco dos Santos, husu ba pessoal saneamentu sira atu hatudu prestasaun servisu ne’ebé di’ak, ho disiplina no responsabilidade aas, liu-liu iha komunidade sira nia le’et atu garante sidade dili nafatin moos.
Pessoal saneamentu hirak ne’e mai husi kompanñia ne’ebé kolabora hamutuk ho Autoridade Munisípiu Dili, ho papél importante atu asegura ambiente sidade ne’ebé limpu no konfortável ba komunidade.
Iha oportunidade ne’e, PAM Dili entrega mos lista pessoal saneamentu sira ba Administrador Postu Administrativu haat (4), hanesan Nain Feto, Cristu Rei, Vera Cruz no Dom Aleixo. Medida ne’e halo atu fasilita prosesu kontrolu no koordenasaun entre autoridade lokal no pessoal saneamentu, nune’e servisu bele la’o ho efisiénsia no rezultadu ne’ebé di’ak liu tan.
Autoridade Munisipiu Dili hein katak, liu husi kooperasaun ne’e, sei bele hadia kondisaun limpeza iha sidade laran ne’ebé diak liu.
Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)
AMD LIU HUSI SMASA KONTINUA HALA’O ATIVIDADE LIMPEZA LOR-LORON HODI GARANTE NAFATIN AMBIENTE NE’EBÉ MOS NO SAUDÁVEL BA SIDADE DILI
𝐃í𝐥𝐢, 𝟎𝟐 𝐀𝐛𝐫𝐢𝐥 𝟐𝟎𝟐𝟔
Autoridade Munisípiu Dili liu husi Servisu Munisipál Água no Saneamentu Ambiental (SMASA) kontinua hala’o atividade limpeza lor-loron hodi garante nafatin ambiente ne’ebé mos no saudável ba sidade Dili.
Atividade limpeza ne’ebe hala’o husi SMASA ne’e rasik sempre kobre fatin hotu hotu iha Sidade Laran hanesan, Dalan protokolu too bairu-bairu, drenajen, merkadu no seluk tan.
Ekipa limpeza sira ne’e sempre hala’o sira nia servisu hahu husi tuku 6:00 kalan too tuku 7 dader, ho objetivu evita engrafamentu wanhira loron komunidade sira hala’o sira nia servisu, no objetivu seluk mak oinsa atu nafatin mantein sidade mos, saudavel no hamurak dili.
Autoridade Munisipiu Dili nafatin husu ba komunidade hotu ne’ebe hela iha sidade dili atu nafatin tau ida-idak nia konsiensia humanu hodi soe lixu tuir fatin ne’ebe Governu liu husi AMD prepara ona iha kada bairu sira, labele soe lixu iha valeta laran no soe lixu tuir oras ne’ebe AMD fo sai ona. Atu nunee sidade dili nafatin mantein mos, tamba sidade nia furak fila fali ba ita hotu nia konsiensia.
Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)
𝐀𝐌𝐃 𝐇𝐀𝐋𝐀’𝐎 𝐄𝐍𝐊𝐎𝐍𝐓𝐑𝐔 𝐊𝐎𝐍𝐒𝐄𝐋𝐋𝐔 𝐊𝐎𝐎𝐑𝐃𝐄𝐍𝐀𝐒𝐀𝐔𝐍 𝐌𝐔𝐍𝐈𝐒𝐈𝐏Á𝐋
𝐃í𝐥𝐢, 𝟎𝟏 𝐀𝐛𝐫𝐢𝐥 𝟐𝟎𝟐𝟔
Autoridade Munisipiu Díli (AMD), liu husi Ajénsia Planeamentu Munisipiu, realiza enkontru Konsellu Koordenasaun Munisipál ho Diretor/a Servisus Munisipáis, Administradór Postu Administratívu sira no Sefe Suku sira hodi diskute asuntu tolu hanesan Aprezentasaun Planu Ezekusaun Orsamental 2026, Aprezentasaun Planu Anuál ba tinan 2027 no Planu preparativu simu Prezensa S.E. Primeiru Ministru, Kay Rala Xanana Gusmão.
Enkontru ne’e realiza iha Salaun Enkontru B AMD, iha loron Kuarta-feira, 01/04/2026, hahú husi tuku 08:30 to’o remata. Atividade ne’e nu’udar parte husi prosesu planeamentu anual, ne’ebé fó orientasaun ba programa, sub-programa no atividade sira ne’ebé sei implementa iha tinan 2027.
Objetivu prinsipál husi enkontru ne’e mak:
• Prepara no harmoniza Plano Asaun Anual 2027 tuir Programa no Sub-programa sira;
• Garante alinhamentu ho Planu Estratéjia Dezenvolvimentu Munisipál Díli (PEDMD);
• Prepara visita husi S.E. Primeiru-Ministru iha Autoridade Munisípiu Díli ho diak liu.
Prezidente Autoridade Munisípiu Díli, Sr. Francisco dos Santos, hateten katak kolaborasaun husi parte hotu-hotu importante tebes hodi asegura planu ne’ebé realistiku.
“ ohin ita ko’alia kona-ba asuntu tolu ne’ebé importante liu mak primeiru kona-ba aprezentasaun husi Diretora finansas ba atualizaun ita nia ezekusaun progresu sira, segundu planu asaun anuál ba tinan 2027, diresaun ida-idak tenke hatene saída mak ita tenke halo ba tinan 2027, ne’ebé tenke tuir planu estratezia tinan 2026 too tinan 2030, imi rasik hatama ita nia planu tuir planu estratezia munisipál Ninian ne’e tenke haree didiak, no ikus mak kona-ba ita nia preparasaun ba vizita Sua Excelencia Primeiru Ministru Kay Rala Xanana Gusmão ho nia kometiva, ita tenke prepara an halo didiak tamba ita ultimu, depois iha referensia barak ne’ebé iha liu husi munisipiu sira seluk ho nia diversidade ne’ebé mak iha, entaun ida ne sai mos referensia ba ita” dehan PAM
AMD hein katak liu husi enkontru ida ne’e, sei hadi’a liu tan koordenasaun inter-institusionál no aumenta efisiénsia iha prestasaun servisu públiku ba povu iha Munisipiu Díli.
Fontes : (𝐌é𝐝𝐢𝐚 𝐆𝐚𝐛 𝐏𝐀𝐌)
𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒𝐈𝐏𝐈𝐔 𝐃𝐈𝐋𝐈 𝐏𝐀𝐑𝐓𝐈𝐒𝐈𝐏𝐀 𝐄𝐍𝐊𝐎𝐍𝐓𝐑𝐔 𝐏𝐑𝐄𝐏𝐀𝐑𝐀𝐒𝐀𝐔𝐍 𝐊𝐎𝐌𝐈𝐒𝐀𝐔𝐍 𝐎𝐑𝐆𝐀𝐍𝐈𝐙𝐀𝐃𝐎𝐑𝐀 𝐁𝐀 𝐄𝐕𝐄𝐍𝐓𝐔 𝐃𝐈𝐋𝐈 𝐈𝐍𝐓𝐄𝐑𝐍𝐀𝐒𝐈𝐎𝐍𝐀𝐋 𝐌𝐀𝐑𝐀𝐓𝐇𝐎𝐍𝐀 𝟐𝟎𝟐𝟔
𝐃𝐢𝐥𝐢 𝟑𝟏 𝐌𝐚𝐫𝐬𝐮 𝟐𝟎𝟐𝟔
Reprezentante Prezidente Autoridade Munisipiu Dili Xefe Gabinete Sr. Julio da Silva partispa iha enkontru preparasaun Komisaun Organizadora ba eventu boot 3 Dili Internasional Marathona, Simeira Siénsia ba Dezenvolvimentu no Natal ba Povu.
Enkontru nee lidera husi Sua Exelénsia Vise Primeiru Ministru, Ministru Koordenador Assuntu Ekonómiku no Ministru Turismu no Ambiente Sr. Francisco Kalbuadi Lay no Chefe Casa Civil Prezidente Republika Sra. Henriqueta Maria da Silva no partisipa husi Ministra Edukasaun, Ministru Juventude Desportu no Arte Kultura, Ministru Interior, Ministru Ensinu Superior, Ministru Komersiu Industria, Vice Ministru Saude, Vice Ministra Solidariedade Sosial no Inklizaun, Diretora Geral GPM, Sekretariu Estadu Floresta, Sekretariu Estadu Komunikasaun Sosial, Komandante PNTL, reprezenta WHO iha Timor-Leste no tekniku sira.
Iha enkontru ne’e, Vice Primeiru Ministru nudar Prezidente Komisaun Organizadora fahe kedas tarefa servisu ba ministeriu relevantes sira no Ministru Juventude Desportu no Arte Kultura mak sei responsavel ba eventu Dili Internasional Marathona, Ministra Edukasaun no Ministru Ensinu Superior mak responsavel ba Eventu Simeira Siénsia ba Dezenvolvimentu no Ministra Solidariedade Sosial no Inkluzaun mak responsavel ba Eventu Natal ba Povu.
Tuir planu kada ekipa responsavel sei prepara no aprezenta fali planu orsamentu ba iha enkontru tuir mai.
Prezidente Komisaun Organizadora husu ba membru sira katak tenki aselera preparasaun eventu Dili Internasional Marathona 2026 ne’ebe tuir planu sei realiza iha fulan Agustu tinan ida ne’e.
Inisiativa hirak nee, mai husi Exelénsia Prezidente Republika ne’ebé kada tinan sempre realiza ho objetivu atu promove paz no estabilidade nasional.
Fontes : (𝐌𝐞𝐝𝐢𝐚 𝐆𝐚𝐛.𝐏𝐀𝐌)
𝐅𝐄𝐓𝐎 𝐏𝐎𝐓𝐄𝐍𝐒𝐈𝐀𝐋 𝐇𝐔𝐒𝐈 𝐂𝐍𝐑𝐓 𝐍𝐎 𝐏𝐃 𝐑𝐄𝐀𝐋𝐈𝐙𝐀 𝐀𝐊𝐓𝐈𝐕𝐈𝐃𝐀𝐃𝐄 𝐊𝐔𝐃𝐀 𝐀𝐈𝐅𝐔𝐍𝐀𝐍 𝐁𝐔𝐍𝐆𝐄𝐍𝐕𝐈𝐋 𝐈𝐇𝐀 𝐀𝐑𝐄𝐃𝐎𝐑𝐄𝐒 𝐂𝐑 𝐇𝐎𝐃𝐈 𝐇𝐀𝐌𝐔𝐑𝐀𝐊 𝐃𝐈𝐋𝐈
𝐃𝐢𝐥𝐢 𝟐𝟖 𝐌𝐚𝐫𝐬𝐮 𝟐𝟎𝟐𝟔
Aktividade kuda aifunan ne’ebé organiza husi grupu feto potensial husi CNRT no PD realiza iha aredores Cristu Rei ho objetivu atu hadia no hafurak ambiente iha fatin refere liu husi plantasaun aifunan bungenvil.
Aktividade ida ne’e marka prezensa husi Vise Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, Prezidente Autoridade Munisipiu Díli, Francisco dos Santos, Sekretáriu Estadu Floresta, Fernandinho Vieira no entidades sira seluk.
Autoridade Munisipiu Díli (AMD) mos kontribui iha atividade ida ne’e liu husi fornese aifunan Bungenvil hamutuk atus ida (100) no pesoal servisu hodi garante implementasaun programa la’o ho diak no atinji objetivu ne’ebé determina ona.
Ho inisiativa ida ne’e, espera katak iha futuru sei iha partisipasaun husi grupu seluk, organizasaun no komunidade sira atu kontinua kontribui iha área sira seluk, hodi hamutuk hadia no hamurak sidade Díli.
Fontes : (𝐌𝐞𝐝𝐢𝐚 𝐆𝐚𝐛. 𝐏𝐀𝐌)
PAM-DILI SEI APLIKA SELU TASA BA VIZITANTE SIRA BAINHIRA VIZITA FATIN TURIZMU
Dili, 27 Marsu 2026
Prezidenti Autoridade Munisípiu Díli (PAM-Díli) iha planu atu aplika selu tasa ba vizitante sira ne’ebé ba vizita fatin turizmu iha área Munisípiu Díli, ho objetivu atu suporta manutensaun fatin turizmu sira no promove dezenvolvimentu setór turizmu iha kapitál nasaun nian.
Prezidenti Autoridade Munisípiu Díli, Francisco do Santos hateten, planu ne’e sai nu’udar esforsu atu organiza no hadia jestaun fatin turizmu sira, ne’ebé durante ne’e akontese aumentu vizitante lokal no mos vizitante husi rai li’ur.
“Ita sei aplika tasa ba vizitante sira ne’ebé mak ba halo vizita ba fatin turista sira, tanba ne’e ita sei tau makina ida hanesan iha aroportu nian nian ne’e, atu nune’e bain hira vizitante sira atu tama maizumenus kontribui netik quertel hanesan ne’e foin tama.
Medida ne’e atu asegura katak fatin turizmu sira iha Díli bele hetan jestaun ne’ebé di’ak liutan. Osan husi taxa ne’e sei uza atu suporta limpeza, seguransa no melhoria fasilidade sira iha fatin turizmu,” hateten Prezidenti Autoridade Munisípiu Díli, Francisco iha Cristu Rei, Díli.
PAM-Díli konsidera katak presiza iha mekanizmu espesífiku atu asegura fatin turizmu sira bele hetan manutensaun no atensaun ne’ebé adekuadu. Tanba ne’e aplikasaun taxa ida-ne’e bele sai solusaun ida atu ajuda responde ba nesesidade sira-ne’e.
“Governu agora sei hadia hela fatin turismu sira hanesan Cristo Rei, tanba ne’e bainhira di’ak ona mak ita sei aplika tasa ba vizitante sira, atu nune’e osan sira-ne’e ita uza hodi hadia fila fali fatin sira-ne’e,” nia esplika.
PAM-Díli mos esplika katak mekanizmu implementasaun selu tasa ne’e sei organiza ho sistema espesífiku atu fasilita vizitante sira bainhira tama ba fatin turizmu, atu garante prosesu rekolla taxa ne’e bele lao ho transparénsia no jestaun ne’ebé sustentável, nune’e bele kontinua atrai vizitante lokal no internasionál sira iha futuru.
Aleinde ne’e, PAM-Díli hateten katak medida ida-ne’e mós iha objetivu atu promove turizmu sustentável, ne’ebé bele proteje no preserva poténsia turizmu iha Díli ba tempu naruk.
PAM-Díli espera katak politika selu tasa ba vizitante sira bele sai fonte rendimentu ida atu ajuda dezenvolve setór turizmu iha Díli, nomós kontribui ba esforsu atu promove imajen Díli nu’udar destinasaun turizmu iha Timor-Leste.
Iha parte seluk, vizitante Aljira Miranda fó hanoin katak aplikasaun selu taxa bele sai medida ida di’ak, maibé presiza iha garantia katak osan ne’ebé rekolla husi taxa ne’e uza ho transparente no realmente atu hadi’a kondisaun fatin turizmu sira.
“Se taxa ne’e uza atu hadia limpeza, seguransa no fasilidade sira iha fatin turizmu, ami hanoin di’ak, tanba vizitante sira mós presiza kondisaun ne’ebé di’ak bainhira ba vizita,” hateten vizitante Aljira.
Nia hateten katak sira la iha problema atu selu taxa bainhira vizita fatin turizmu, karik medida ida-ne’e bele ajuda melhora fasilidade ba vizitante sira.Nia dehan katak governu presiza asegura katak implementasaun medida ne’e la bele fó todan liu ba vizitante sira.
Fontes : https://thediliweekly.com
𝐃𝐆𝐓𝐂 𝐎𝐑𝐆𝐀𝐍𝐈𝐙𝐀 𝐖𝐎𝐑𝐊𝐒𝐇𝐎𝐏 𝐍𝐀𝐒𝐈𝐎𝐍𝐀𝐋 𝐍𝐎 𝐄𝐍𝐊𝐎𝐍𝐓𝐑𝐔 𝐊𝐎𝐍𝐒𝐔𝐋𝐓𝐀𝐒𝐀𝐔𝐍 𝐇𝐎 𝐒𝐓𝐀𝐊𝐄𝐇𝐎𝐋𝐃𝐄𝐑 𝐒𝐈𝐑𝐀
𝐃í𝐥𝐢 𝟐𝟔 𝐌𝐚𝐫𝐬𝐮 𝟐𝟎𝟐𝟔
Prezidente Autoridade Munisipiu (PAM) Dili, Sr, Francisco dos Santos partisipa iha workshop nasional no enkontru konsultasaun ho stakeholder sira, ne’ebe mak organiza husi Direção Geral de Transportes e Comunicações (DGTC), liu husi Ministério dos Transportes e Comunicações (MTC), iha kolaborasaun ho UNESCAP-Transport Division, ho objetivu atu fortalese dezenvolvimentu setor transportes no komunikasaun iha Timor-Leste.
Prejensa PAM Dili iha Workshop refere hodi hato’o preokupasaun no rona mos planu estratéjiku husi Ministeriu Transporte no komunikasaun liu-liu konaba Engrafamentu no Estasionamentu ne’ebe agora dadauk sai hanesan preokupasaun bo’ot ba sidadaun sira iha loron-loron. Problema ne’e mosu tamba sidadaun barak maka hola transporte foun, maibe seidauk iha fatin apropriadu hodi para kareta(Paragen), ne’ebe halo dalan sai nakonu hodi difikulta movimentu tráfiku.
PAM mos hateten katak asuntu ne’e hato’o ona ba Sua Excelencia Ministru MTC tamba problema Engrafamentu no Estasionamentu iha Munisipiu Dili ne’e presija tau atensaun lalais hodi sei buka solusaun atu hadi’a sistema Tráfiku, no sei servisu ho parte relevante sira atu hari paragen foun iha fatin estratéjiku sira no halo kontrolu ba kareta sira ne’ebe para iha fatin proibidu.
Eventu ne’e fó oportunidade ba reprezentante governu, parseiru dezenvolvimentu, setor privadu, no organizasaun sivil atu hamutuk diskute politika, estratéjia, no programa prioritáriu sira iha área transportes no komunikasaun. Diskusaun sira sei foka ba hadia infraestrutura, aumenta efisiensia servisu, no promove konektividade nasional no rejional.
Kolaborasaun ho UNESCAP mos hatudu importánsia kooperasaun internasionál iha apoiu ba dezenvolvimentu setor transportes no komunikasaun, hodi kontribui ba integrasaun ekonomia no sosial iha Timor-Leste.
Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)
𝐄𝐍𝐊𝐎𝐍𝐓𝐑𝐔 𝐀𝐌𝐃 𝐇𝐎 𝐒𝐄𝐀𝐓𝐎𝐔 𝐊𝐎𝐍𝐀-𝐁𝐀 𝐃𝐈𝐕𝐔𝐋𝐆𝐀𝐒𝐀𝐔𝐍 𝐁𝐀 𝐋𝐄𝐈 𝐒𝐈𝐑𝐀 𝐍𝐎 𝐌𝐄𝐋𝐇𝐎𝐑𝐈𝐀 𝐒𝐄𝐑𝐕𝐈𝐒𝐔 𝐏Ú𝐁𝐋𝐈𝐊𝐔
Dili, 𝟐6 𝐌𝐚𝐫𝐬𝐮 𝟐𝟎𝟐𝟔
Prezidente Autoridade Munisípiu Díli, Sr. Francisco dos Santos hamutuk ho Sekretáriu Estadu Assuntu Toponímia no Organizasaun Urbana (SEATOU), Germano Santa Brites Dias, SECAM 1,2,3, Diretores Munisipaís, Konsellu Konsultivu Munisipal, Diretor Geral Toponimia no Orgaizasaun Urbana, Diretor Nasionál Jestaun Hijiene no Ordem Públika, Diretór Nasionál Toponimia, Diretór Nasionál Servisu Organizasaun Urbana, diskuti kona-ba lei divulgasaun ne’ebé iha SEATOU nia okos no oinsa melloria prestasaun servisu públiku Autoridade munsípiu iha Timor-Leste.
Enkontru ne’e hala’o iha salaun B Autoridade Munisípiu Díli, Kinta feira ne’e.
PAM Dili, Sr. Francisco dos Santos, hatete katak enkontru ne’e importante tebes atu halo divulgasaun lei no asegura katak funsionáriu no autoridade hotu kompriende no implementa lei sira ho diak.
“Ha’u husu ba ita hotu atu akompanña didiak enkontru ida ne’e no aproveita oportunidade atu husu bainhira iha dúvida, tanba lei sira mak baze ba ita nia servisu. Ita presija implementa ho rigor atu la prejudika sistema legal no atu garante higiene no ordem públika iha Díli,” dehan PAM.
Nia mos husu ba Diretores Munisipaís no Autoridade Lokal sira atu prepara-an, identifika problema iha kada Suku, hodi nune’e bele responde ho diak bainhira vizita husi Sua Excelência Primeiru Ministru, Kay-Rala Xanana Gusmão iha tempu besik.
Intervensaun husi Sekretáriu Estadu Assuntu Toponímia no Organizasaun Urbana (SEATOU), Germano Santa Brites Dias informa ba diretór Obras Públika, Autoridade lokal sira iha obrigasaun atu kontrola bairu-bairu sira, oinsa atu servisu ho kualidade, kontrola kompanñia sira iha kada suku, tamba ita hakarak dezenvolve dili ne’e sai sidade ne’ebé diak liu iha futuru.
“planu ne’ebé presija halo iha futuru mak hare ba okupante sira ne’ebé okupa rai estadu husi tempu indonésia to agora. tuir planu governu liu husi SEATOU servisu hamutuk ho AMD sei kontinua sobu mak, komunidade sira ne’ebé okupa rai estadu hanesan kaikoli, beto, Bairo-Pite husi Kapela nia oin sei sobu too Palasiu-Prezidente, rai payol lahane too leten sei sobu hotu, no mos loja ka andar sira ne’ebé loke iha sidade dili sei Haruka hotu hotu tenke iha fatin estasionamentu iha andar okos, negosiante sira ne’ebe faan sasan iha MESJID kampun-Alor atu hasai sasan antes ekipa SEATOU too. No mos fahi luan sira ne’ebe SEATOU identifika sei la tolera no hasai hotu husi sidade dili”.
Iha Enkontru ne’e partisipa másimu husi ekipa Autoridade Munisípiu Dili, hanesan Sekretária Munisipál Administrasaun no Finansas, Sekretariu Munisipál Administrasaun Planeamentu, Investimentu e Dezenvolvimentu Integradu, Sesretáriu Munisipál Assuntus Sosiais no Organizasaun komunitárias, Diretores Munisipaís, Ekipa SEATOU, Administrador Postu Administrativu nain lima (5), Autoridade lokal sira, Funsionariu AMD
Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)
PAM DILI HAMUTUK HO SEATOU, DIRECTOR SERVISU MUNISIPAL OBRAS PUBLIKA NO TRANSPORTE, HAHÚ MONTA PLAKA BA ZONA ESTASIONAMENTU IHA ÁREA CRISTO REI
𝐏𝐫𝐞𝐳𝐢𝐝𝐞𝐧𝐭𝐞 𝐀𝐮𝐭𝐨𝐫𝐢𝐝𝐚𝐝𝐞 𝐌𝐮𝐧𝐢𝐬𝐢𝐩𝐢𝐮 𝐃𝐢𝐥𝐢, 𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬 𝐡𝐚𝐦𝐮𝐭𝐮𝐤 𝐡𝐨 𝐒𝐞𝐤𝐫𝐞𝐭á𝐫𝐢𝐮 𝐄𝐬𝐭𝐚𝐝𝐮 𝐀𝐬𝐮𝐧𝐭𝐮 𝐓𝐨𝐩𝐨𝐧í𝐦𝐢𝐚 𝐧𝐨 𝐎𝐫𝐠𝐚𝐧𝐢𝐳𝐚𝐬𝐚𝐮𝐧 𝐔𝐫𝐛𝐚𝐧𝐚 (𝐒𝐄𝐀𝐓𝐎𝐔), 𝐆𝐞𝐫𝐦𝐚𝐧𝐨 𝐒𝐚𝐧𝐭𝐚 𝐁𝐫𝐢𝐭𝐞𝐬 𝐃𝐢𝐚𝐬, 𝐃𝐢𝐫𝐞𝐜𝐭𝐨𝐫 𝐬𝐞𝐫𝐯𝐢𝐬𝐮 𝐌𝐮𝐧𝐢𝐬í𝐩𝐚𝐥 𝐎𝐛𝐫𝐚𝐬 𝐏ú𝐛𝐥𝐢𝐤𝐚 𝐧𝐨 𝐓𝐫𝐚𝐧𝐬𝐩𝐨𝐫𝐭𝐞, hahú monta plaka ba zona estasionamentu iha área Cristo Rei, Munisípu Díli
Ekipa téknika hahú ona monta plaka ba zona estasionamentu foun iha área turístika Cristo Rei nu’udar parte husi planu modernizasaun no organiza parajen transporte públiku/privadu hodi aumenta rendimentu munisípiu Díli nian.
Husu ba sidadaun sira atu kumpri no respeita plaka estasionamentu foun sira ne’ebé monta ona hodi asegura orden iha fatin públiku no Implementasaun ba Sistema ne’e husi Autoridade Munisipal Díli (AMD), liuhosi Diresaun Servisu Munisipal Obras Públikas no Transporte.
𝐃𝐢𝐥𝐢, 𝟐𝟒 𝐌𝐚𝐫𝐬𝐮 𝟐𝟎𝟐𝟔
PAM Dili Sr. Francisco dos Santos hamutuk ho Diresaun Geral Terras Propriedade implementa despezu administrativu ida tuir desizaun husi Ministeriu Justisa. Atividade ne’e mos akompaña husi PNTL Munisipiu Dili atu garante seguransa no ordem durante prosesu ne’e.
Despezu administrativu ne’e hala’o atu asegura katak propriedade sira ne’ebé iha disputa bele rezolve tuir lei no regulamentu vigora iha Timor-Leste. Durante implementasaun, parte hotu-hotu kolabora di’ak no situasaun mantén kondisaun seguru.
Fontes : (𝗠é𝗱𝗶𝗮 𝗚𝗮𝗯. 𝗣𝗔𝗠)
© 2026 Autoridade Municipal Dili
